Bonaire y Curaçao lo traha mas di cerca hunto. Por lo tanto ambos isla a firma un acuerdo di Hermandad. E acuerdo a ser firma pa Prome Minister di Curaçao Eugene Rhuggenaath y Comisionado Elvis Tjin-Asjoe di Bonaire.
Esaki mester impulsa e comercio y industria mediante e transporte di mercancianan liber di impuesto y trabounan di importacion entre e islanan. Entre otro riba tereno di comercio y industria, evaluacion di e transporte di productonan entre e islanan sin mester paga impuesto ni derecho di importacion, mehoracion di conectividad entre e islanan, promocion di turismo duradero y intercambio di conocemento riba tereno di enseñansa, salud, gobernacion y mas.
Segun Promé Minister Rhuggenaath, “Nos tin un laso di hermandad fuerte paso nos islanan y nos hendenan ta conecta historicamente, familiar y cultural. Nos por saca hopi mas probecho mutuo dor di combina forsa riba diferente tema. Esaki ta un prome paso y seguidamente nos lo sigui concretisa e oportunidadnan den gobierno y cu partnernan den comunidad”.
Diputado Tjin Asjoe tambe ta convenci cu“nos por tin hopi mas na otro den nos afan pa logra desaroyo duradero, si nos colabora y comparti conocemento y experiencia riba diferente area di interes comun.”
Prome cu e restructuracion politico na 2010, Corsou y Boneiro a traha evidentemente hunto riba hopi tereno, pero ora a desmantela Antias na october 2010, mayoria di e convenionan entre e dos islanan a yega na un final automaticamente. Tanto Prome Minister Rhuggenaath di Corsou, como Diputado Tjin Asjoe di Boneiro cu a bini cu e iniciativa ta di opinion cu, despues di dies aña, e momento a yega pa un acercamento mas profundo riba tereno gubernamental, pero tambe pa stimula colaboracion riba tur nivel di comunidad na e dos islanan.
