E situacion politico na nos hermana isla ta tumando un rumbo sumamente peligroso. Gobierno interino no a caba di sinta drechi, cu nan a cuminsa tuma accion caba contra e unico tarea pa cual nan a keda nombra. Tur cos ta parce nada mas nada menos cu un gara di poder di e persona, di ken su participacion den parlamento ya tabata cuestiona, pa motibo di e condena cu el a ricibi di corte di prome instancia di tres aña pa corupcion.
Ironicamente e persona aki ta haci uzo di e mesun instrumento ‘innovativo’ cu su contrincantenan na Curaçao y na Den Haag a crea algun aña pasa, tempo cu prome gabinete di pais Curaçao a bira demisionario, y hopi di nan tabata tur spanta di un Schotte ainda pa varios luna na poder como gobierno demisionario. A percura pa un mayoria nobo, den un parlamento cu tabata disolvi caba, y a crea e ‘gobierno interino’, cu e tarea limita di percura pa eleccion por tuma luga. Kico ta pasa awor? Gobierno a baha, a dicidi hunto cu Gobernador cu ta bay eleccion dia 28 di april proximo. Gobierno Hulandes a laga sa caba cu e decision ey firma pa Gobernador, tin nan apoyo completo y por lo tanto en principio no lo tolera cu e gobierno interino ta bay amplia su facultadnan incluyendo e posibilidad di deshaci di e anterior decision di tene eleccion na april. Si nos ta comprende bon, gobierno Hulandes lo no tolera esey y por ta cu gobernador ta haya instruccion pa no firma.
Si finalmente gobierno interino insisti den esaki, y por ehemplo cuminsa duna instruccion na e departamento y autoridadnan gubernamental pa para e proceso di prepara eleccion, ta yega un momento crucial unda gobierno di Reino mester tuma un decision: ta bay obliga gobierno interino pa cumpli cu nan tarea y nada mas, o ta bay sinta discuti un otro opcion, cu den cierto forma por calma e situacion. Si dicidi cu ta tuma medida di forsa y ta bay obliga gobierno implementa e preparacionnan, por yega un momento cu por implementa esaki solamente a traves di imposicion, cu poder arma na nan banda. Practicamente e metodo ta bay ta cu via un decreto real ta pone e departamentonan concerni bao di mando directo di Gobernador, y den cual e Gobernador ta haya instruccion pa percura cu e preparacionnan pa eleccion ta tuma luga. Si tin obstruccion den esaki, di cualkier banda, lo tin uzo di e brasa arma cu cual Reino ta conta.
Un situacion cu cualkier persona cu dos placa di sinti, lo tin gana di evita. Pero esey ta bay sucede tambe? E problema ta cu den e caso aki no ta solamente un cuestion legal/politico. E problema mas grandi por surgi ora cu personanan individual cuminsa reacciona riba e situacion aki, subiendo caya, eventualmente topando cu contrincante politico, en corto, un problema mayor di orden publico cu ningun hende cu sano huicio lo desea. E eventual papel cu politiconan lo hunga den esaki, yamando pa mantene orden y calma, o al contrario instigando hende pa atenta contra ley, lo ta di crucial importancia.
E noticia cu ya elementonan di e gobierno interino ta subi caya pa colecta firma, pero tambe pa convence hende di nan rason, por resulta e portal pa yega na situacionnan incontrolabel, si nan no haya rason den e conflicto aki. Loke e prome ministro nobo mester realisa masha bon, cu bo no por sinta como responsabel maximo di orden y siguridad publico, y na mes momento bo ta den e posicion di lider di desobediencia publico riba caya. Si esaki bay for di man y bo no por actua, pasobra ta trata di e mesun hendenan cu bo a instiga pa subi caya, anto ta crea un base legitimo pa na nivel di supervision di Reino nan haci nan trabao… Nos por corda cu na juli 2014 na Aruba tambe nos tabata cerca di un situacion asina, si e hostigacion y insulto di e representante di Rey a sigui.
Ta na interes di pueblo di Curaçao, y tambe di economia di e isla, pa saca e mecha for di e bari di polvo cu ta surgiendo awor. Esey ta implica cu e gobierno nobo mester wak bon kico nan ta haci. Menasa cu bay Corte Europeo ta nada mas cu un menasa bashi, pasobra si bo no tin un decision di un autoridad, bo no por ni bay hues, mucho menos na Europa. Loke realmente ta na interes di pueblo, ta pa pone e veredicto den su man pa dicidi ken lo goberna. Anto esey yama eleccion, of no? Ta parce cu e meta di Schotte y demas aliadonan ta pa crea un situacion unda gradualmente nan por move den direccion di keda sinta te na final di e periodo di gobernacion, pasando pa e fase intermedio di pospone eleccion. No ta probabel cu gobierno di Reino ta bay acepta e wega aki. E unico manera pa haya poder ta bay eleccion y logra un mayoria cu por sostene un gobierno pa un periodo regular. Esey ta e caminda democratico tambe.
