Un grupo di protestante a blokea Boulevard Presidente Romulo Betancourt cu truck den area di Parera. Nan a para dilanti edificio di ministerio di Desaroyo Economico exigiendo un reunion cu minister di Economia, Dr. Steven Martina.
Nan ta protestando e aumento recien den prijs di combustibel. E manifestantenan a bisti t-shirt cu e texto ‘I can’t breathe Curaçao’.
Minister Martina a adresa e manifestantenan aki, pero aparentemente nan kier continua nan protesta y entrega un carta na e minister. E minister a indica cu e ta ocupa durante e dia, y cu nan lo mester dun’e e carta na otro momento, pero e manifestantenan a rechasa esaki.
E manifestantenan a bisa cu prijs di oil a cay mundialmente. Nan no ta compronde pakico luna pasa a aumenta e tarifanan, y e luna aki atrobe. Polis tabata na e sitio pa tene un bista riba e situacion.
Mientras tanto, chauffeurnan rabia a blokea Schottegatweg Zuid cerca di Ministerio di Desaroyo Economico (MEO). Tabatin bus, van chikito, truck y tow truck riba caminda. E chauffeurnan, ademas di protesta e aumento di prijs di combustibel, tambe ta protesta su mal calidad.
Giovani Decaster di Sindicato Transporte Uni (STU) a bisa den un declaracion cu e lucha contra e aumento di prijs di combustibel ta andando pa añas. “Ta basta awo”, el a bisa.
