E reto financiero cu varios compania aereo regional y internacional ta pasando aden, no solamente ta produci un impacto riba nos industria turistico, sino tambe riba nos mercado laboral.

Relaciona cu e caso reciente di e suspension operacional di PAWA Dominicana, ya caba minister di Transporte, Comunicacion y Sector Primario, Chris Romero (MEP) a bati bel. E mandatario a laga sa cu e echo cu PAWA no lo por bula pa 90 dia ta traduci den un tension y incertidumbre pa tur esunnan cu ta biahando cu e aerolinea aki pa Aruba. Pero tambe e tension politico cu Venezuela tin como consecuencia cu e aerolinea nan Laser y Albatros ta haya nan obliga di disminui nan vuelonan pa nos pais.

Igualmente e instabilidad reinante cu Insel Air ta bibando, unda cu un biaha mas nan tin algun dia caba imposibilita pa bula. Sin lubida cu e compania Aruba Airline ta confronta su propio retonan tambe. E compania aki ta drentando un situacion fastioso mirando e embargo tuma pa gobierno di Venezuela. E aerolinea ta conta cu mas di 100 mil turista di nos pais bisiña. E decision unilateral di e gobierno di Venezuela pa mantene e prohibicion di comunicacion aereo y maritimo entre nos pais bisiña y islanan ABC, ta afecta nan. Esaki mirando cu un gran parti di e vuelonan cu e aerolinea ta conta cu ne ta conecta cu nos pais bisiña.

Segun minister Romero, tur esaki ta crea un situacion caminda por papia di un disminucion significativo di trafico turistico pa nos isla, y ya caba gobierno ta sondeando e posibilidad cu mester por yega na un solucion pa atende e situacion actual den mundo di aviacion cu ta operando na Aruba.

Efecto mercado laboral
Di otro banda mediador di gobierno, Anselmo Pontilius a laga sa na Bon Dia Aruba cu no mester desconoce cu e situacion aki tambe por afecta nos mercado laboral. Durante un reunion reciente cu minister di Labor, mediador di gobierno a recomenda e mandatario pa bin cu un evaluacion rapidamente. Segun sr. Pontilius ta evidente cu tin companianan local cu ta brinda servicio na e companianan aereo manera Laser y Albatros cu ta bin di Venezuela.

E companianan local cu tin cantidad di trahadonan den nan servicio ta depende di nan clientenan di Venezuela. Pues ta evidente cu e situacion di Laser y Albatros tin efecto riba nan. “Si e situacion ta sigui asina no ta exclui cu e companianan ta bay reduci nan personal”, el a bisa. Te ainda no tin un panorama di cuanto trahadonan nan trabou por core peliger debi na e situacion di e companianan aereo aki.

Mediador di gobierno ta haya cu ta importante pa bin cu un inventarisacion rapido pa sa con lo afecta e companianan cu ta brinda servicionan. Tin algun di e companianan aki cu ta traha cu trahadonan cu contracto temporal, pero tambe nan tin trahadonan cu ta traha permanente. Mas tanto nan ta e companianan cu ta traha directo na aeropuerto y nan clientenan ta e companianan aereo di Venezuela.

Un compania manera Laser ora cu tabatin fluho di Venezolano pa bin Aruba te hasta nan a aumenta nan vuelonan diario pa nos isla. Esaki a haci cu e companianan local cu ta brinda servicio den aeropuerto a aumenta nan cantidad di trahadonan. E situacion actual cu Laser y otro compania ta pasando aden ta haci cu esaki logicamente tin consecuencia. Ta spera cu e siman aki nos por haya sa cu mas claridad kico lo pasa cu e companianan aki, y si ta asina leu con hopi trahadonan nan ta bay reduci. Aworaki e problema ta si e trahadonan aki ta keda sin trabou, unda nan ta bay…

PAWA Dominicana
Mientras cu e situacion di PAWA Dominicana ta sigui ainda den incertidumbre, un fuente fidedigno cu a prefera pa no revela su nomber a laga sa na Bon Dia Aruba cu intencion di e compania aereo aki ta esun di renegosha nan debe. Pa tal motibo nan ta buscando un acercamento cu gobierno Dominicano presidi pa Danilo Medina pa eventualmente nan por sigui nan operacion pa fin di luna aki. Pero te ainda e panorama pa PAWA no ta mucho cla, ya cu nan kier paga nan debenan, pero e compania no por cumpli si nan avionnan no tin autorisacion pa bula. Pero di otro banda di nan 5 avion cu PAWA tabatin na 2015 ora cu nan a cuminsa nan operacion, apenas e compania tin 2 avion certifica pa bula.

Mientras cu e website di noticia Hoy Digital a informa cu e Hunta di Aviacion Civil di Republica Dominicana, cu ta esun cu a bin cu e sancion contra PAWA, a laga sa cu lo demanda e compania aki si nan no ta paga nan debe prome cu diabierna awor. E presidente di e hunta aki, Luis Ernesto Camilo a bisa cu PAWA tin un debe di aproximadamente 1.5 miyon dollar Mericnao na Instituto Dominicano di Aviacion Civil (IDAC). Otro debe di 1.5 miyon dollar Mericano na e grupo Aeropuertos Dominicanos Siglo XXI (Aerodom); y 1.6 miyon dollar Meriano na Direccion General di Impuesto Interno (DGII), kiermen e ta un debe total di alrededor di 4.6 miyon dollar Mericano.

Mientras cu pa juli proximo ya caba un cantidad di 17 mil persona a cumpra ticket pa bula cu PAWA, e hunta a emiti un resolucion cu ta obliga PAWA Dominicana pa soluciona e situacion di e pasaheronan cu ainda no por a bula pa nan destino.

Presidente di e hunta a informa cu PAWA Dominicana pa emiti un comunicado na varios compania Dominicano pa mas o menos 5.180 persona cu a paga nan ticket cu credit card y nan por haya nan placa bek durante e proximo 21 dianan. Un 65 porciento di PAWA su benta di ticket ta via credit card. Nan ta spera cu durante e proximo dianan alomenos prome cu fin di luna, e problemanan cu e pasaheronan tin cu PAWA Dominicana lo wordo soluciona.