United Farmers Aruba ta un asociacion cu a lanta na augustus di aña pasa cu e fin di ta un plataforma cu, na e momentonan aki, ta conforma pa 32 di agricultor y asina cuminsa un negociacion conhunto cu Santa Rosa y e Ministerio di Agricultura pa nan haya apoyo y sosten.
Durante un entrevista cu Bon Dia Aruba a tene cu Gregory Fung–A–Fat, Presidente di United Farmers Aruba, a splica cu for di basta tempo, nan como agricultornan tin varios preocupacion cu a presenta den reunion hunto cu Minister di Agricultura Chris Romero.
E puntonan di e negociacion tabata tocante, na prome luga terenonan, di dos luga prijsnan di awa cu coriente, di tres un publicacion di aña 2016 cu Minister Bermudez a trece dilanti cu cierto belasting cu nan como cunukero supuestamente no tin cu paga y tambe e parti di inversion cu ta trata cu e banconan local no ta kere den industria di agricultura pa Aruba.
Fung a destaca cu na september, ora nan a haya e reunion cu Minister Romero, nan a trece dilanti e parti di tereno, pero door cu e ROP tabata den proceso di discusion nan a bisa pa e miembronan di Aruba Farmers di warda un tempo estableci pa esey lo por tuma luga, no obstante, Fung a comenta cu te ainda nan ta wardando y nada no a wordo haci.
Di loke ta trata awa cu coriente, Fung a señala cu nan ta pasa door di un planificacion cu WEB cual Santa Rosa, hunto cu ministerio a presenta un documento basta profundo, pero te eynan el a yega; e awa di dam por uza pa cierto cosnan, pero pa agricultura nan no por uza e awa ey.
Di parti di infrastructura cu nan tin cu Santa Rosa tin hopi parti debil, den sentido cu nan ta depende riba un truck y un chauffeur, pero si un no ta funciona, nan no ta haya awa, y el a bisa cu nan ta den un posicion dependiente di otro.
Riba e parti di belasting, Fung a bisa cu el a comprende cu na comienso di e aña aki un comision a ser instala door di e Minister Romero pa dirigi esey pero tampoco nan no a haya informacion, Fung a expresa cu den papel cu ta firma caba door di Minister Bermudez, ta bisa cu e cunukeronan no tin cu paga belasting, pero esey no ta defini ki tipo di belasting.
Fung a manifesta cu e aña aki nan a papia hopi, sinta na mesa, nan a purba di haci diferente cosnan pa nan miembronan, pero nan ta ‘desapunta’ manera e mes a bisa, pa motibo cu ‘nos no ta haya oido di Gobierno’.
Igualmente, Fung a expresa cu den un reunion cu Minister Presidente Evelyn Wever Croes na ocasion di gobierno su intencion di fomenta tecnologia y agricultura den plan economico, a analisa con gobierno tin pensa di stimula e pilar nobo di agricultura. “Si nos ta pusha di un banda, y nan ta papia otro di otro banda; con nan por yega na otro pa cuminsa cu e proyecto aki?”.
Asina mes, el a papia cu loke a sali afo di e reunion cu Minister Presidente varios dia pasa, riba cierto temanan definitivamente nan kier wak cierto cosnan cambia, como por ehempel e parti di belasting cu segun Fung a expresa “Minister mes a bisa cu e lo tuma esey pa un clarificacion, pa motibo cu no ta un cambio di ley, pa wak kico e ta”.
Tambe, el a resalta cu otro topico cu na a papia hopi riba dje tabata coriente, pa motibo cu e minister a bisa cu e kier wak ‘innovacion’ pero pa esey mester uza hopi electricidad, segun Fung a comenta, Minister Presidente a bisa cu el a bay combersa cu WEB y Elmar tocante esey pa wak con e cunukeronan por haci, “nos ta dispuesto di paga un cost prijs, pasobra nos tur ta sali gana di full e industria aki, nos tur ta beneficia di dje”.
Tocante e punto di apoyo y sosten cu sector di agricultura kier ricibi di banda di e banconan local, Fung a duna como ehempel cu na Corsou e gobierno ta para garantia pa cierto proyectonan cu nan ta kere den dje, nan ta traha y presenta un Business Plan y si nan ta haya cu esey ta algo cu nan por sostene nan ta duna un garantia door di gobierno cu 2% di interes, esey ta e stimulacion cu Fung ta bisa cu mester pa haci cierto negoshi.
