Un miembro di e sector primario di agricultura cu a identifica su mes como “cunukero humilde”, a expresa su disgusto y preocupacion riba cierto desaroyo cu ta tumando luga, y cu ta demotiva e cunukeronan chikito den nan actividad.
Molinanan daña
Un problema cu e cunukeronan chikito ta pasando aden y cu a bira un dolor di cabes, y un gasto pisa pa nan, ta e molinanan cu ta abastece nan cu awa, y cu mayoria di nan no ta trahando pa varios siman caba. E unico cu ta trahando ta esun di Savaneta, pero tin biaha no tin suficiente awa of e rij di cunukero ta asina largo wardando un chens pa bay cu un tiki di awa.
E molina di Noord no ta trahando, mientras cu otro molina situa entre Babijn y Tamarein, cu a wordo condiciona cu un taki di plastic di 10 mil liter, nunca a traha. Nan no kier a instala mas tubo pasobra supuestamente no tin mas awa. “Anto pa kico nan a trahe sin un estudio prome”, asina e cunukero a bisa.
Mal servicio
Di otro banda e cunukero a bisa cu ora cu el a yega di bati e porta di Santa Rosa pa algun tipo di ayudo of guia, e ta topa cu un muraya su dilanti, ya cu nan no ta brinda e ayudo cu tin mester y/of esun cu ta atende cu publico no tin conocemento amplio riba e productonan cu nan mes ta bende. “Bo ta bay Santa Rosa y niun hende sa nada…”, el a bisa.
E ta haya cu esun cu ta bati porta di Santa Rosa mester ricibi ayudo di berdad. “No laga nan kere cu nos ta kens lagando nos nomber atras riba un lista, y nunca nan no ta tuma contact cu nos….”, el a bisa.
Importacion
E cunukero aki ta aplaudi e decision di minister Oduber pa kita belasting riba importacion di productonan y instrumentonan uza den e sector primario aki. E ta haya cu e decision aki ta “masha bunita mes” pero e ta un ayudo pa e agricultornan grandi so, y no pa e cunukeronan chikito cu ta e gran mayoria den e sector aki.
E ta haya cu e ley aki no ta tene cuenta cu nan, ya cu e cunukero y criado di bestia humilde ta dedica na su parcela chikito cu nan cultivo ta masha limita. Nan no tin cantidad di bestia of galiña pa cria y dificilmente nan por lanta un compania riba nan mes pa bira un importado di productonan, ya cu nan no tin recurso pa esaki.
Pa importa nan mester pasa den henter un proceso burocratico y gastonan pa lanta un compania cu na final nan mester paga belasting pa tene habri. “Nos ta hibando awa pa lama”, el a bisa. Esun cu si ta wordo beneficia –segun e cunukero aki- y cu lo saca probecho di e ley aki, ta e agricultor grandi.
Si un cunukero chikito mester importa algo, e mester busca un compania cu ta importa esey pe. Pero e producto aki lo tin otro prijs, ora cu e yega cerca e cunukero chikito. E ta haya cu mester bin cu un sorto di cooperativa di cunukeronan chikito cu lo por importa e productonan aki cu cero belasting pa bende na un prijs rasonabel cerca nan.
“Si nan no ta bin cu nada, e ley aki no ta sirbi pa e cunukeronan chikito, ya cu nos no ta wak e beneficio di dje. Sino nos lo keda mesun leu…”, el a laga sa.
