Proyecto di Secret’s Hotel na Baby Beach ta un topico cu ta sigui keda como noticia unda ayera prome minister Evelyn Wever-Croes den un declaracion pa redactor di Bon Dia Aruba a confirma cu Gobierno di Aruba a considera e obhecion contra permiso di construccion y ta bay tin un decreto nobo manera hues a pidi den e ultimo sentencia.

Mediante un comunicado di prensa di dia 11 di juli ultimo, grupo di habitante di Sero Colorado cu a entama un caso contra proyecto di e compania Three Rivers na Baby Beach, a indica cu dia 7 di juli nan a bolbe haya rason di hues cu ‘Secrets Hotel’ no ta cumpli cu tur exigencia di bienestar (welstand) y como tal minister encarga pa Asuntonan General, Innovacion, Organisacion Administrativo, Infrastructura y Ordenanza Teritorial Evelyn Wever-Croes mester tuma e obhecion contra e permiso di construccion di e cambernan y bin cu un decreto nobo teniendo cuenta cu e exigencianan minimo aki, segun hues a indica.

Pa esaki, ayera mainta prome minister a informa cu pa Gobierno di Aruba e proyecto aki ta hopi importante y nan ta kere cu e ta contribui na e desaroyo di San Nicolas y na e desaroyo general di Aruba.

Den e ultimo veredicto, prome minister a sigura cu e hues di LAR “a pidi pa substancia dos aspecto mas miho, esey nos ta finalisando y den curso di e dianan aki esey lo ta cla tambe, kiermen cumpliendo cu e veredicto di hues y pa asina nos continua, ohala pronto no los por mira cu desaroyo lo continua na hotel,” el a sigura.

Ademas a informa cu esaki ta trata di un beschikking op bezwaar loke ta nifica segun prome minister a sigura, un decreto nobo.

Den e comunicado e habitantenan, representa pa abogado Mr. Maritza Boyce ta señala cu nan tin dos aña ta bringando e punto aki den Corte. Minister a duna Three Rivers permiso pa construccion di un hotel na Sero Colorado dia 28 di mei 2020 y despues di a ricibi obhecion di e habitantenan a saca un decreto dia 9 di maart 2021, indicando cu e grupo no ta admisibel pa entrega obhecion. E habitantenan a haya rason di Corte di LAR dia 9 di februari 2022, esta cu nan tin tal derecho basa riba nan argumentonan y a destrui e decreto. Den e sentencia ey di 9 februari 2022 a instrui e minister pa tuma un decision nobo basa riba e obhecion di e habitantenan.

Den mesun linea, prome minister a bisa cu gobierno tabatin un conversacion cu e compania aki siman pasa y e compania a indica cu nan kier sigui cu e proyecto pero e no por tarda demasiado, nan no a papia tocante un time line of un dead line, “esey no ta algo cu ta poni riba mesa, nos tin cu haci loke nos tin cu haci di nos parti, y nan tin cu haci nan parti, nos tin comunicacion cu otro, kiermen si lo mester yega na momento cu nan ta bisa ‘Ok, te aki nos ta yega’ mi ta supone cu nan ta informa nos prome cu esey, pero te awor no tin un dead line riba mesa,” el a sigura.

“Como gobierno a mi no ta un hende cu ta pidi un accion di firma”

Manera Bon Dia Aruba a publica den su edicion di dia 13 di juli ultimo, dia 10 di juli minister di Turismo Dangui Oduber a trece dilanti su opinion tocante e topico aki riba su Facebook page unda el a skirbi “lo por ta bon pa bin cu un accion di firma pa wak cuanto ciudadano ta na fabor of contra di e proyecto aki cu lo crea un spin off economico.”

Den aspecto huridico, un accion di firma no tin un base legal y si kier a tuma e iniciativa aki mester a haciel’e for di comienso di e proyecto cu awor tin cuatro aña caba, continuando cu e aspecto legal ta un hues di corte ta dicidi unda un accion di firma no ta bay cambia loke e hues a dicidi y esaki ta loke prome minister tambe a señala den su conferencia di prensa di ayera mainta.

Den su declaracion pa e caso aki prome minister a comenta cu nan como politiconan y vooral su persona como lider di partido MEP, ta haci nan encuentronan den bario y nan ta campaña cu nan hendenan na unda cu den curason di San Nicolas a lanta cu un deseo pa bin cu un accion di firma na fabor di e hotel, cu hopi hende cu kier expresa cu nan ta sostene e hotel.

Pero ora ta trata di un accion di firma, prome minister a sigura cu tambe mester mira kico lo kier logra cu e accion di firma, “ta hopi importante pa prome bo ta bay cuminsa cu un accion bo mester ta duidelijk kico bo ta bay puntra pa esun cu ta bay firma sa kico e ta pidi.”

Tambe a trece dilanti cu papiando cu un persona den comunidad a yega di bisa cu si 1.000 hende ta firma esey ta nifica cu lo ta mas di esnan cu ta contra e hotel, pero den caso aki “nos ta bezig cu tin un caso den corte, tin ley cu bo tin cu tene na cuenta cu esey y no ta tur ora un accion di firma por ta riba esey, no por kibra lo cual cu corte of leynan ta bisa, di otro banda si e por duna un impresion, esey por ta algo por haci un impresion cerca un hues pa por pone tur cos den balans, na fin di dia nos no por influencia decision di hues, como gobierno nos ta respeta cu cada un tin su poder, nos tin poder ehecutivo, corte tin e poder hudicial di duna e veredictonan y parlamento tin poder legislativo y nos ta wak e ora nos tarea,” el a sigura.

Ademas el a papia cu si ta un accion di firma dirigi na gobierno, e ora ey nan tin cu mira si ta fit in den esaki pero gobierno sigui ta kere cu e proyecto aki ta importante y nan lo sigui traha te na final pa nan por logr’e debi cu na final di dia si e proyecto no ta bay door, gobierno por haya un daño y perhuicio y ta e pueblo esun cu tin cu bay paga tambe, “esey ta un punto cu pa nos di gobierno ta hopi importante pa tene na cuenta cune, como gobierno a mi no ta un hende cu ta pidi un accion di firma, mi tin cu haci mi trabou y mi sa cu e sosten pa hotel ta hopi mas grandi cu e cantidad di hendenan cu ta contra pero den caso aki nos tin cu cana e caminda cu hues a stipula minuciosamente y netjes.” El a finalisa.