Diasabra a celebra cumpleaños di Reina Elizabeth II di Reino Uni cu un ceremonia mas chikito cu usual, ya cu a cancela e parada anual Trooping the Color pa motibo di pandemia di coronavirus.
E despliegue extravagante di pompa y boato, un punto culminante riba kalender real cu tipicamente ta atrae miles di turista pa para den rij riba cayanan di London central, a ser cancela unicamente un biaha anteriormente durante casi 70 aña di reinado di e reina – na 1955, durante un welga nacional di trein.
E aña aki, un cantidad mas chikito di soldad y musico militar a duna tributo na e monarca na Windsor Castle. E reina a ricibi un saludo real, prome cu mira un despliegue di soldad cu a marcha riba tereno di e kasteel teniendo cuenta cu reglanan di distanciamento social.
Tabata e prome apariencia publico oficial di reina Elizabeth desde cu a impone medida di lockdown na maart.
E reina a celebra su cumpleaños number 94 dia 21 di april, pero su cumpleaños ‘oficial’ semper a ser celebra cu e parada Trooping the Color na juni. E ‘color’ ta referi na e banderanan representando e diferente regimiento di ehercito Britanico.
E evento usualmente ta conta cu centenares di soldad y cabay den e parada, un procesion di carruaje cu famia Real, y un despliegue di forsa aereo real riba palacio di Buckingham.
Un evento asina marcando e cumpleaños di un monarca no a ser teni na Windsor desde 1895, aña den cual a tene un ceremonia na honor di reina Victoria.
