Cuminsando awe turistanan tin cu paga 20 dollar pa sustainability fee prome cu drenta Aruba

Manera a keda anuncia pa gobierno, cuminsando awe 1 di juli turistanan mester paga 20 dollar pa un sustainability fee pa por drenta Aruba. Esaki ta ser cobra na momento cu nan aplica pa nan ED pa por drenta e isla y ta un cobransa cu mester ser paga un biaha pa aña pa persona.

E sustainability fee aki, cu ta drenta na vigor awe, a keda introduci pa yuda cubri e gastonan di e trabounan cu tin cu ser realisa pa loke ta trata e mehoracion, actualisacion y mantencion di e planta di RWZI, cu recientemente a ser privatisa.

Segun prome minister a splica durante conferencia di prensa na comienso di luna di juni a scoge pa cobra e turistanan pa no pone un impuesto adicional riba e pueblo di Aruba.

El a menciona cu Boneiro tin algo similar, pero e ta costa 75 dollar, mientras cu di Aruba ta 20 dollar aworaki y tin algun excepcion. Por ehempel, muchanan bao di 8 aña, localnan y esnan cu ta biba na Aruba no mester paga esaki. Ademas bishitantenan cu ta bishita Aruba varios biaha pa aña no mester paga ya cu e 20 dollar ta conta pa henter un aña.

E noticia aki a causa confusion entre turistanan cu no tabata sigur si e informacion ta oficial, si e informacion ta corecto y tin cu no tabata na altura cu esaki lo drenta na vigor entrante 1 di juli, esta awe.

Varios usuario a expresa nan malcontento pa loke ta e introduccion di e cobransa aki. “Ta e desaroyadornan ta esunnan cu mester paga un suma grandi prome cu nan por construi y despues di e construccion cobra nan impuesto y talbes hasta construi algun tipo di sistema di residuo pa nan propiedad,” un usuario a indica.

Mientras otro a comenta cu turistanan por djis scoge pa no bishita Aruba mas. “Kico nan lo haci? Nan ta cobrando nos impuestonan di mas y mi no ta sigur cu e placa ta bay unda cu e mester bay.”

Otro usuarionan tabata di acuerdo y a indica cu nan no tin problema pa paga 20 dollar pa aña si e ta contribui pa mehora y soluciona e problema di RWZI. “Cada isla tin un tarifa of costo di entrada. Nos lo paga cu gusto semper cu e contribui na e infrastructura di e isla y e permiti e apoyo pa turismo,” un usuario a indica.

“Contento di por yuda un tiki. Nos, turista, tin impacto positivo y negativo riba e infrastructura di e isla,” otro usuario a resalta.