Pa loke ta seguro di studiantenan local studiando na Hulanda, gobierno a cuminsa atende mesora cu esaki segun minister plenipotenciario Guillfred Besaril (MEP). A cuminsa atende riba e asuntonan aki conhuntamente cu colega minister di enseñansa Rudy Lampe (ReD) caminda a tuma e decision cu lo continua cu e seguro actual pa un grupo di studiante. Pa motibo cu tabata tin tres luna prome cu e seguro caduca – tabata tempo di eleccion ainda – pa tuma decision si ta sigui cu e seguro si of no, si no bo ta haya bo den default pa loke ta e aspecto huridico den seguro segun sr. Besaril.
Pa ora cu gobierno nobo a asumi responsabilidad na November 2017 tabata practicamente laat pa nan bisa pa stop cu e seguro den su forma actual. Sr. Besaril ta bisa cu ya caba el a cuminsa haci e reunionnan necesario pa sinta cu esnan cu ta maneha e seguro y trece e dolornan pa dilanti. Pa mira cu tin un miho entendimento pa loke ta nos hobennan na Hulanda. Minister di Enseñansa aki na Aruba lo bay cuminsa cu e tramitenan necesario pa wak si ta bay bin un seguro nobo, si lo continua cu e mesun compania of si lo bin un otro compania. Sr. Besaril ta enfatisa cu tur esaki lo bay wordo trata den e proximo lunanan pa si bin un seguro nobo cu esaki cuminsa cu esunnan cu ta bay Hulanda for di juli 2018 bay dilanti te ora cu por pasa tur hobennan cu ta na Hulanda pasa na un seguro nobo. Of por lo menos pa ricibi un miho servicio cu ta mas adecua cu esun actual. “Nos a tuma nota di e problema y ya nos a tuma accion riba dje,” e minister plenipotenciario ta subraya.
Investiga pa mehora
E mandatario ta bisa cu tin cierto cosnan cu gobierno a constata cu mester investiga pa mira con e ta precisamente hinca den otro pa asina aki por mehora e servicio. “Nos a compronde caba cu e tin di haber cu e seguro no ta aparece riba tur caminda na Hulanda; Por ehempel nan ta aparece cerca dokter pero no dentistanan, e ta aparece cerca cierto specialista y otronan no. Esey ta pone cu nos tin cu bay investiga berdad te con leu e ta si esey ta e caso.”
E mandatario a sigui splica tambe cu na momento berdad cu bo pasa bo carchi na Hulanda anto cu bo no ta aparece den sistema, logicamente bo ta haya e servicio pero bo tin cu paga. Anto esey ta e tipo di cosnan cu por hinca un hoben den problema financiero si e no a premira e cosnan aki. “Y esey ta locual nos hobennan ta pasando den dje. Ta p’esey nos tin e contactonan necesario pa sinta y resolve e asunto aki. Mientras cu e servicio cu ta practicamente uno cu ta wordo renoba anualmente, pues e ora ey por haci e ehercicio necesario pa mira si ta un compania of otro compania cu lo bin na beurt pa duna servicio. Y den ki forma esaki lo sosode,” sr. Besaril ta splica.
Scarcedad di camber
Sr. Besaril ta bisa cu tin un particularidad na Hulanda cu e gran mayoria di nos hobennan na Aruba ta opta pa bay studia sea na Amsterdam, Groningen, Rotterdam, Utrecht of Eindhoven. Esaki ta cinco lugarnan caminda mayoria di hobennan di Antiyas ta concentra. Na Hulanda den e ciudadnan grandi aki mes hende tin dificultad pa haya luga di biba, pues imagina esnan cu kier bin di afo biba eynan segun e mandatario a splica. Pues e ta sigui bisa cu den e proximo añanan e ta bay bira un tarea pa educa nos hobennan cu tin mucho mas opcion ora nan bay Hulanda. Pa duna hobennan informacion adecuado unda cu e mesun studio ey cu e kier haci, e lo por haci e na cualkier otro partinan di Hulanda. “Den cual e ora ey e problema di haya luga pa biba ta menos complica. Aworaki pasobra tin hopi concentracion y tur hende kier hinca nan curpa den e concentracion, e ora ey bo ta haya cu ta bin e problema aki automaticamente.” E mandatario a conclui cu tin mas opcion y ta riba informacion tin cu bay traha pa asina nos hobennan tin un miho conocemento di kico ta spera nan na momento cu nan kier bay studia un carera. Tin e problema di tarda pa haya un camber/luga di biba y cu nan ta caro tambe. Pues e ora ey segun sr. Besaril, tin cu bin un solucion cu e la cuminsa papia riba dje caba cu colega minister Lampe.
