E compania cu gobierno ta paga pa basha ex Bushiri Hotel abou y entre otro deshaci tambe di e material cu asbest, a cuminsa cu e trabounan. Sinembargo nan no a informa publico general di e trabou, locual ta stipula den e normanan cual departamento di DTI mester supervisa.

Manera conoci e edificio tin asbest den e dak y tambe na bandanan di e murayanan. Esaki un compania Hulandes ya a saco afo na 2012 despues di haci test riba nan propio gasto. Nan a avisa gobierno pa actua mas pronto posibel como cu e material cu asbest tabata kibra y por haya pidanan tur caminda riba e tereno. Mientrastanto e tereno tabata accesibel y chollernan, piscadonan tabata cana eynan frecuentemente. E compania aki tambe a haya e situacion hopi peligroso como cu e asbest tabata kibra caba y e biento lo sprei e vezel di asbest facilmente den aire.

Sinembargo despues di publicacionnan den medionan local, gobierno nunca a haci un intento di limpiesa, aunke promesanan, te cu augustus e aña aki. Gobierno a invita prensa fin di augustus pa anuncia cu e compania local esta We Build/ Van Den Broek Construction, Labor & Cleaning a gana e destaho pa haci e trabou dentro di mas o menos 55 dia. E compania indica cu nan ta sigui e normanan na Hulanda. Kico specifico nan ta, no ta mucho cla solamente cu nan a indica cu nan ta uza saconan special tambe pa warda e material cu asbest den dje. Tin casi 6000 m2 cu nan mester kita.

Na augustus director di DOW tambe a bisa cu nan lo traha un plan di siguridad y salud hunto cu e departamentonan di Salud, DTI y e compania. Kico e plan ta encera no ta conoci ainda y Bon Dia Aruba ya a puntra diferente instancia pa mas claridad. Nos a haya confirmacion si cu bisiñanan entro otro hotel Tamarijn Divi a wordo notifica cu tin trabou di kitamento di asbest na Bushiri Hotel.

Sinembargo nos observacion na comienso di e siman aki ta:

-No ta informa publico en general cu tur dia ta pasa riba e caminda LG Smith Boulevard, sea ta cana na e beach cerca y/of e acera dilanti e edificio.

-Tin hopi biento atrobe e dianan aki pero nos no a constata cu e compania ta mantene e asbest muha pa evita cu material ta sprei.

-Tin riba diamars y diaranson nos no por a mira aparatonan di midimento. Mester remarca si cu no por a inventarisa e tereno completo, sinembargo na e luga specifico unda e trahadonan tabata kita parti di dak etc, no por mira niun aparatonan di midimento.

Manera informa nos ta trahando riba e storia aki y purbando di haya mas informacion y reaccion di e partidonan envolvi.

En general: asbest ta un substancia cu ta causa cancer. Momento cu un vezel caba ta drenta bo curpa, e por causa cancer sinembargo e ta tuma sigur un 10 aña prome cu e malesa lo establece. Esunnan cu ta traha cu e material aki di cerca, ta core mas riesgo. Sinembargo si nan no ta sigui un procedura di limpiesa despues di haci trabou cu asbest, e substancia por keda den nan paña, cabey etc. Esun cu ta limpi nan paña y otro material uza, tambe mester tene cuenta cu nan ta core riesgo.