Gobierno di Aruba, diabierna atardi tabatin un cumbre virtual cu lidernan sindical di sector publico, sector semi-publico y sector priva, y Mediador di Gobierno. E intencion di e encuentro virtual aki tawata pa comparti informacionnan mas actual di e situacion di nos pais a consecuencia di Covid, e situacion financiero, e palabracionnan cu Hulanda den cuadro di landspakket, y locual cu Gobierno ta trahando riba dje pa futuro.
Prome Minister Evelyn Wever-Croes a habri e encuentro virtual expresando cu den ultimo dianan ta sinti e presion y tension causa pa e pandemia Covid tur caminda. Esaki ta wordo sinti den nos comunidad, na nos casnan, na trabou y hasta ta parce cu Gobierno y sindicato tin problema cu otro.
“Personalmente mi no ta kere cu esey ta e caso. Mi ta kere cu berdad sindicato y Gobierno tin problema cu tur locual cu ta pasando. E pandemia y e presion cu Hulanda ta pone como condicionnan pa por presta Aruba placa, Prome Minister a expresa”.
Den su introduccion Premier Wever-Croes a enfoca riba e condicionnan cu Hulanda a impone, y cu Aruba mester cumpli cu nan pa por haya financiamento.
Premier Evelyn Wever-Croes a presenta e impacto di Covid riba nos pais indicando cu 1 den cada 5 ciudadano ta depende di pakete di cuminda. 20 mil trahado di sector priva nan trabou ta core peliger y Gobierno ta subsidia. 11 mil hende cu a perde trabou debi na COVID ta haya FASE. 2500 compania ta haya sosten financiero. A pesar cu entrada a baha, Gobierno a cumpli cu esnan mas vulnerable.
Prome Minister a ilustra den su presentacion cu a pesar cu Gobierno a perde gran parti di su entrada, y cu e gastonan a aumenta pa atende cu e pandemia, Gobierno a sa di cumpli cu esnan cu a perde trabou, y esnan cu ta na riesgo pa perde trabou, y mes momento, sigui provee servicionan vital, manera cuido di salud, enseñansa, proteccion, etc.
“Nos no por a haci esaki riba nos mes. Pa logra esaki nos tabata, nos ta, y nos lo sigui depende di ayudo di Hulanda. Nos no tin otro escogencia, mare nos tawata tin”, Prome Minister a accentua.
Prome Minister finalmente a haci un apelacion na sindicatonan bisando: “Mi ta pidi boso pa boso sigui ta solidario, pasobra pa awor ainda, nos ta depende di Hulanda y nos lo keda depende di Hulanda. Pa nos keda depende di Hulanda nos mester cumpli. Pa nos cumpli nos mester di e esfuerso y sacrificio di boso tur pa un tempo ainda”.
