Durante e cumbre virtual cu Gobierno di Aruba realisa via su Facebook page cu algun hoben y profesional den diferente area, varios pregunta a ser haci pa asina haya sa kico ta e plan cu Gobierno tin mirando e condicionnan cu Hulanda a pone pa por haya mas subsidio.

Prome minister Evelyn Wever-Croes a cuminsa dunando un relato di lo cual crisis di coronavirus a trece como consecuencianan pa e pais den areanan economico y financiero, for di e momento ey Wever-Croes a bisa cu pa por sali di problemanan financiero ta bay tuma hopi esfuerso y sacrificio, como tambe e buskeda di un ayudo.

Pa via di esaki, Aruba mester a pidi e ayudo pa Hulanda e cual e tabata dispuesto segun loke el a anuncia, pero cu diferente condicionnan cu a wordo cumpli y ora a pensa cu por haya e fiansa, cuatro dia prome di e reunion di ministernan di Reino a haya un pakete di mas di 200 pagina di condicionnan nobo.

Wever-Croes a menciona cu te ainda nan ta den negociacionnan y cu nan a logra algun punto importante di lo cual nan tabata kier y sinembargo, “ainda nos no ta caminda nos mester ta”, el a sigura.

E cumbre aki a dura aproximadamente dos ora y mey na unda diferente experto di area financiero, huridico y innovativo a trece dilanti nan puntonan mas importante. Un di nan tabata Varelie Croes,Chief Innovation Officer cu a conta cu su persona a guia e sub-comision di innovacion y resiliencia, conhuntamente cu 17 task force cu otro profesionalnan cu a traha hunto pa asina guia y facilita e proceso pa yega na un Masterplan pa loke ta trata Aruba su recuperacion economico y innovacion.

Croes a comenta cu aworaki nan ta ricibiendo ideanan di hobennan y esnan den area profesional,pa asina cu nan lo caba di ricibi e perspectivanan, nan lo por finalisa e plan aki den dos of tres siman.

El a bisa cu e plan ta un refleho di un proceso participatorio unda mas cu 125 persona a participa, e mayoria di manera boluntario pa traha riba un vision of plan cu opcionnan concreto pa yuda defini e rumbo nobo di e pais.

Esaki tin un duracion di tres aña, desde 2020 te cu 2023.Manera Croes a informa, poniendo aspectonan di desaroyo sostenibel y responsabel y un bista riba recursonan natural central, enfoca tambe riba beneficionan a corto plazo.

Durante desaroyo di e Master plan, segun Croes a defini kico ta e retonan principal cu mester atende como prioridad.Algun di nan ta trata di Sector Publico, clima empresarial y mercado laboral, aspecto di inclusividad y modelo economico circular. Tambe a introduci algun aspecto cu ta trata di sostenibilidad y resiliencia manera salubridad, bienestar y inclusividad pa tur ciudadano, crea un mercado laboral cu conocemento y capacidad amplio cu por adapta na cualkier circunstancia.

Croes a trece dilanti cu a identifica algun proyecto cu tin prioridad y cu tin di haci cu reforma di mercado y ley laboral, reforma fiscal, implementacion di e plataforma di E-Goverment, entre otro amplifica y reforsa e capacidad legislativo. El a sigura cu tin hopi ley cu mester cambia of mester actualisa y hopi di e accionnan di e Master plan ta requeri cambio di ley.

Diferente organisacion y persona cu ta traha den sector priva a trece dilanti nan pregunta y preocupacionnan pa loke ta trata e condicionnan cu Hulanda a pone pa Aruba, entre nan di Marilis Becker cu a comenta cu,si manera prome minister a splica, Aruba a cumpli cu tur condicion prome cu a presenta e pakete di medida ya conoci caba, dicon esey no ta suficiente?

Pa cu esaki, Wever-Croes a señala cu Aruba a haci tur lo posibel pa cumpli cu e condicionnan, algun di nan tabata mas dificil cu otro pero asina mes nan a keda sorprendi, pero cu nan tin un responsabilidad tambe y p’esey nan ta sigui negocia y cu Hulanda mes a aproba e Masterplan.

Kareline Van der Linde di Universidad di Aruba a puntra kico ta e plan di Gobierno di Aruba pa restart economia di Aruba si no haya e subsidio di Hulanda.Prome minister a expresa cu e plan lo sigui igual, e Masterplan ta e linea cu nan lo sigui traha cune, pero pa por ehecuta esey mester di fondo.

E plan B, segun Prome Minister, si no acepta e condicionnan di Hulanda ta “cu nos no tin un Plan B, no tin mucho opcion y ta a traves di Hulanda cu bo tin cu haci’e y cu na e momentonan aki no ta mira Merca como un posibilidad”.

Roberto Kelly representante di Aruba Bank, a puntra cu, mirando e condicionnan mara, con factibel Gobierno di Aruba ta mira cu por cumpli cu e condicionnan. Director di Directie Financien Derick Werleman a bisa cu Aruba su economia ta crece mas tanto por medio di turismo. Mester traduci esey den e normanan cu cual mester cumpli; el a indica cu mester tin un surplus di 1% di GDP pa e proximo añanan, si yega na un periodo di recuperacion di GDP den tres aña; for di e momento ey, dependiendo di con e posicion di debe ta y manteniendo disciplina fiscal, ta posibel pa yega na esaki pero ta depende di con economia ta sigui crece.