Ayera mainta a tuma luga e marcha cultural organisa pa St. Paulus School hunto Scol Santa Teresita, Rayo di Solo Kleuterschool y Scol Caiquetio en conexion cu celebracion di Dia di Himno y Bandera di Aruba. Un marcha yen cu creatividad, ambiente y na unda cultura y historia di Aruba sobresali.

Cada scol cu a participa den e marcha a scoge un tema, relaciona cu Aruba, pa presenta durante e marcha. Maestro-, mayor- y alumnonan tur a uni y cu hopi creatividad a traha paña, headpiece y otro tipo di decoracionnan pa luci ariba e cayanan di San Nicolas. Alrededor di 600 mucha a participa den e marcha cultural y a wordo compaña pa Cuerpo Policial y Rode Kruis.

St. Paulus School ta organisa e marcha cultural aki cu e meta pa engrandece participacion di e

alumnonan na actividadnan cultural y haci actividadnan cultural mas accesibel pa pueblo di

Aruba. Nan kier engrandece cultura pa medio di formacion y educacion structural como parti di nan curriculum y alabes inulca e sentido patriotico den e alumnonan.

Pa loke ta e temanan cu cada scol a presenta, St. Paulus School ta trahando hopi cu Aruba Certification Program y e scol lo ta uzando hopi di e temanan cu e muchanan ta haya den e programa aki den klas den e marcha cultural. Cada klas tin un tema diferente cu nan ta presenta, pero tur ta relaciona cu e lesnan cu e alumnonan a haya den klas di pais Aruba.

Colegio Santa Teresita, cu e aña aki ta celebra 90 aña di existencia como e prome scol di San Nicolaas, a scoge pa conta e storia di e pueblo di piscadonan di San Nicolas y cada klas tabatin un tema relaciona na pisca.

Klas 1 y 2 tin e tema di piscanan rond di Aruba, klas 3 y 4 tin e tema Coral y Turtuga di Aruba y

klas 5 y 6 tin e tema di piscadonan. Cada klas bisti un headpiece cu ta wordo decora segun e tema di e klas.

Rayo di Solo Kleuterschool a representa e tema di placa den e marcha cultural. Cada klas, cinco klas den total, a representa un biyete di Aruba. Klas 1 a representa biyete di 10 florin, klas 2 e biyete di 25 florin, klas 3 e biyete di 50 florin, klas 4 tabata e biyete di 100 florin y klas 5 a representa e biyete di 200 florin.

E alumnonan di cada klas a bisti un headpiece cu tabata decora cu e bestia of simbolonan di e biyete cu e klas tabata representa.

Pa Scol Caiquetio esaki tabata e prome biaha cu nan a participa a indica cu e esaki ta prome den e marcha cultural di St. Paulus School. Scol Caiquetio ta un scol di enseñansa special y mas cu claro esaki no tabata un impedimento pa e muchanan a gosa y disfruta durante e marcha cultural.

E scol a representa su nomber, Caiquetio y a scoge pa conta e historia di e indjannan. E alumnonan a bisti T-shirt cu nan mes a decora den klas durante lesnan di obra di man, cu figuranan di e tribu Caiquetio.

Hopi hende a acudi pa presencia y apoya e muchanan di e scolnan den e marcha cultural cual tabata algo hopi bunita pa mira.