Cultura por crea beneficio economico

Minister Otmar Oduber conhuntamente cu su consehero Sra. Indra Zaandam a bishita Stadsherstel N.V. na Amsterdam. E compania aki ta encarga cu renobacion y compra di edificionan monumental di e ciudad. Nan rol den e comunidad ta di suma importancia mirando cu nan ta e entidad cu ta mantene e caracter di Amsterdam atraves di e edificionan historico. Stadsherstel N.V. tin alrededor di 600 edificio di tur tipo manera cas, compania y te hasta misa.

Es mas e oficina di e compania mes ta situa den un misa cu ta multifuncional. Banda di fungi como oficina e monumento a keda cu su funcion como misa pero a bira tambe un localidad cu por huur pa evento y recepcionnan special of exposicionnan. Un ehempel bibo di con lo por crea beneficio economico cu un herencia material cu ta forma parti di bo cultura. Sr. Paul Morel cu ta senior projectleider di Stadsherstel ta enfoca netamente riba e aspecto aki. E ta comparti cu e delegacion di Aruba e importancia pa tin bon contacto cu tur e partnernan of actornan esencial den e sector di nos monumentonan, transparencia y comunicacion abierto na tur momento ta esencial. Den nan maneho ta envolvi e partnernan den un etapa tempran. Pa cualkier proyecto mester tin tambe un bon plan di maneho defini. Un “Business Plan” transparente y solido pa tur inversionista cu ta interesa di ta envolvi den e sector aki ta na altura di kico por ehempel nan ‘return in investment’ pues ki beneficio lo por tin pa nan despues di nan inversion. Asina cu sinta na mesa mester comparti e mision y vision di e organisacion of den e caso di Stadsherstel como compania.      

Sr. Morel ta indica tambe cu un proyecto di restauracion compara cu un proyecto di construi un edificio nobo, ta uno hopi mas complica, pasobra tin un responsabilidad pa mantene e historia di e edificio pero na mes momento haci funcional tambe. Mester tin un enfasis pa crea e balansa ideal di e historia / caracter di e monumento pero na mes momento mester enfoca tambe riba e funcionalidad di e edificio. Pa consehero di Minister di Cultura, Indra Zaandam tur e informacion comparti ta tipnan valioso pa Aruba. “Ta interesante pa mira similaridad den e fasenan. Na Aruba awor cu e maneho di Minister Oduber ta trahando duro den e etapa di conscientisacion di e importancia di mantencion y salvaguardia nos herencia material. Nos kier pa comunidad completo compronde pakico ta asina importante pa mantene y salvaguardia nos herencia y nos cultura. Pero awor nos ta enfocando tambe poco poco pa crea e beneficio economico for di nos edificionan.” 

Na Amsterdam den añanan 80 tabatin e mesun fase di conscientisacion, unda lamentablemente hopi edificionan monumental tabata wordo destrui of basha abou. Despues di un bon campaña di conscientisacion dor di colaboracion cu partnernan den e sector a bin realisa e importancia di nan herencia material y asina a tuma e pasonan pa salvaguardia esaki. Sra. Zaandam ta finalisa bisando: “Amsterdam ta un di e ciudadnan ehemplar unda cu tin e conexion, e colaboracion y e sinergia entre cultura y economia. Cultura por crea beneficio economico si e ta sosteni pa un bon plan, cu un bon sistema di comunicacion entre tur entidad y cu e colaboracion di e sector priva como tambe di esun publico.”