Ciudadnan rond di mundo a keda afecta pa e pandemia global di coronavirus COVID-19, awor mas cu nunca ta un momento dificil, e poder di cultura y creatividad mester probecha pa fortalece e vinculo entre persona- y ciudadnan.
E medio cultural tambe ta keda afecta pa e crisis crea pa coronavirus y awor e pregunta ta con e cultura y arte lo sigui, con lo organisa actividadnan cultural y con e medionan local lo haci pa comparti arte na distancia.
UNESCO a haci siguimento tocante luganan cu ta forma parti di patrimonio mundial cu na e momentonan aki ta totalmente cera, museonan y institucionnan cultural ta perde miyones di dollar di ingreso dia pa dia. Ta mobilisando e comunidad internacional pa mehora e acceso pa cultura y patrimonio online, pa asina fomenta e capacidad di resiliencia di artistanan.
E necesidad di digitalisa e cultura den e circunstancia aki a yega y di mesun manera mester tin apoyo di personanan involucra den industria cultural. Festividadnan y eventonan cultural a wordo cancela di manera sorpresivo, cual a pone pa pensa riba su futuro y su relacion cu hermentnan di comunicacion, dado e aislamento cu mundo ta biba door coronavirus.
Tur cos a cambia, tambe hopi artista musical a ofrece conciertonan di un manera menos convencional, por ehemplo, Rolling Stones cu for di cas a graba videonan cu a wordo mira pa miyones di persona via internet, loke por califica como un exito.
Cu esaki, cultura a logra mantene un vinculo cu su audiencia aunke di manera limita. A traves di rednan social, website y plataforma digital e comunicacion a sigui y museonan a cuminsa habri pa ricibi e hendenan utilisando protocol di salubridad segun Organisacion Mundial di Salud (WHO) ta regarda.
Bon Dia Aruba a puntra Stanley Dabian, PR di Departamento di Cultura Aruba, tocante e topico aki. El contesta cu e posicion di e departamento na e momentonan aki pa loke ta trata cultura despues di coronavirus ta cu nan mester identifica prome loke ta trata e ‘Normal Nobo’ y mester yega na un acuerdo pa realisa a base di un maneho di Gobierno di Aruba. Na momento cu esey ta keda cla y fiha, poco poco lo por yena con tur cos lo cana.
Ta berdad cu ya caba nan a cuminsa pensa mas riba proyectonan digital y documenta, mirando e distanciamento social cu mester existi.
Tambe el a informa cu na Aruba ta existi e competencia denomina ‘Arte di palabra Aruba (AdP) cu mester a tuma luga dia 28 di maart y a wordo cancela pa motibo di e pandemia.
Di esaki, Comision di AdP cu ta consisti di personal di Departamento di Cultura Aruba y miembronan di Fundacion Corector di Papiamento (FCP), a bin cu un idea pa organisa un AdP virtual. Den e caso aki a mantene e reglanan simpel y no via scolnan manera normalmente ta e caso, cu diferente categoria. Un cantidad di 8 hoben a participa na e competencia virtual aki, cual ta hobennan cu a yega di participa na e competencia AdP den pasado. E hobennan mester a graba nan presentacion di poesia/storia via un video y manda esaki online. Un cuerpo di hurado di 3 miembro a husga e obranan pa asina yega na un resultado final.
Ayera diahuebs 28 di mei, ganado y participantenan a ricibi nan certificado y premio na Departamento di Cultura, cu a wordo entrega pa director di e departamento Siegfried Dumfries.
Di mesun manera, el a menciona cu e competencia di Arte di Palabra ABC cu ta ser organisa entre e islanan ABC tambe a ser cancela. E aña aki e mester a tuma luga na Boneiro pa celebracion di Boneiro su di 15 aniversario.
