Kico realmente ta e perspectiva?
Regularmente tin discusion riba e posibilidad di cultiva cannabis na nos isla. Esey separa ainda di e debate tocante e aspectonan medicinal y e uzo recreativo di e mata aki. Cu cannabis ta algo cu por cultiva den nos clima ta algo sigur, djis tuma na cuenta cu regularmente polis ta bin topa cu cultivo, den cura di cas, tin ora extension mas grandi den cunucu. E clima no ta un problema, pero ora ta papia di cultivo den forma empresarial, acceso na awa barata ta un obstaculo grandi. Pero esey ta conta pa tur cultivo den nos situacion. Naturalmente cu esunnan cu ta kere cu tin un oportunidad pa cultiva cannabis na un forma legal, es decir no pa benta pa consumo recreativo, pero pa procesa pa haya varios producto cu por tin uzo medicinal, ta mira tambe cu esaki ta solamente posibel si cambia legislacion pa por permiti esaki. Tanten cu esey no ta regla, nos por sigui discuti riba e tema, pero nada no ta bay sucede.
Pero tin un otro problema, y esey ta cu den e mundo aki no ta nos so tin hende cu ta pensa den e direccion aki. Na varios pais tin iniciativa pa bay cultiva cannabis na grandi y pa crea industria a base di esaki, cu ta bay percura pa e productonan medicinal corespondiente. E riesgo cu por surgi ta cu ta dificil pa competi cu paisnan mas grandi, unda ademas, si nos djis wak rond den nos region, produccion ta mas barata, pasobra casi riba tur factor di produccion nos ta mas caro, sea cu ta tereno, insumo importa (fertilisante, simia), awa, y labor. Esey por haci cu pa dia nos caba cu e debate tocante e legalisacion, cu no ta keda regla por lo pronto, si acaso yega asina leu mes, ya e oportunidad pa logra algo cu ta brinda perspectiva a bay. Pa bay produci cierto producto medicinal deriva di cannabis na un escala rasonabel, ya caba ta bira dificil pa competi. Ta keda un mercado local hopi chikito cu no ta brinda tanto perspectiva pa por crece.
Ademas, mester tene cuenta cu lo no ta bay tin un liberisacion total di cultivo y mercadeo di cannabis. E parti di uza esaki como halucinante ta dificil pa imagina cu esey ta bira liber. Esey ta implica cu lo mester tin un control estricto riba esunnan cu tin un permiso pa cultiva, y esey ta otro problema: nos no ta sirbi pa controla! E experiencia en general cu tur tipo di permiso ta cu nos no ta logra organisa sistema adecua di control, sea ta permiso di estadia, pa taxi, pa transporte publico en general, permiso pa empresa, hindervergunning, etc. Nos track record ta tristo.
Pero, nos no kier conta un storia negativo. Nos ta kere sinceramente cu na Aruba cierto tipo di agricultura tin futuro. Por cierto, den nos edicion di ayera nos tabatin un articulo tocante un chef cu ta lamenta cu Aruba no ta haci suficiente pa en todo caso produci mas cuminda pa nos mes, aki mes. Nos no ta papiando si di cultivo na grandi, pasobra practicamente nos no tin tereno mas pa esey, y ademas esey tampoco lo ta asina interesante mirando e volumen cu mester pa mas di 100.000 hende. Loke ta un posibilidad, ta mas bien horticultura, cu por practica riba superficie chikito mes, den cura di cas na modo di papia, y cu ta brinda e posibilidad tambe di tin un ambiente super controla, tanto pa suministro di awa (controla gasto) como control di malesa y plaga.
Nos tin concretamente e posibilidad di specialisa den cierto tipo di berdura, cu balor nutritivo halto y bon prijs, cu tin un bon mercado, entre e hogar y e restaurantnan. No mester lubida cu nos tin centenares di restaurant cu ta cumpra producto fresco, si calidad, prijs y entrega continuo ta bon. E ehemplo pa varios aña caba ta e champignon (mushroom) cultiva aki, cu ta un tiki mas caro cu e producto importa, pero tin su mercado stabiel local a base di su calidad.
Ta di lamenta cu esfuerso di e servicio gubernamental encarga cu agricultura y cria, no ta orienta riba un escogencia permanente pa e cosnan cu nos por haci bon, y ta perdiendo tempo y recurso cu cria di animal grandi, cu practicamente mester biba di cuminda importa y no ta logra yega na un produccion aceptabel, compara cu e carni importa di exterior.
Ta di aprecia tambe cu relaciona cu dia internacional di awa awe ta presta atencion na e posibilidadnan di ofrece awa na un prijs atractivo na nos agricultornan. Den esaki tambe, sin embargo, tin algun aspecto pa considera. Uno ta por ehemplo e problema di transporta awa cu truck. Nos a yega di para keto na e prijs, pa metro cubico, di transporta awa cu truck? Aki atrobe tin cu tene cuenta cu gasto di truck, diesel, salario di chauffeur, etc. Ora ta haci e cosnan aki como hobby, ta bon, pero profesionalmente? Mester por tin otro sistema pa laga awa yega na e productornan. Nos por mira dentro di poco un plan den e direccion aki?
