Ayera atardi a culmina e proyecto anual di Cuerpo di Bombero Fire Prevention Week cual a tuma luga na Bibliotheek cu un parada den centro di ciudad.

Ferdinand Ponson, vocero di Cuerpo di Bombero a splica un poco tocante e proyecto di Fire Prevention Week cual brandweer ta organisa cada aña cu meta di conscientisa pueblo y specialmente muchanan con pa preveni candelanan.

Un di e retonan mas grandi cu e cuerpo ta enfrenta ta netamente e aspecto di conscientisacion den pueblo, segun sr. Ponson. Pa esaki nan kier enfoca riba muchanan y hoben cual por yuda conscientisa mayornan tambe con pa preveni candelanan. Esaki e cuerpo ta cuminsa pa medio di organisa charlanan na 11 diferente scol. “Antes nos tabata haci 5 pa 6 scol, pero e biaha aki nos te hasta a haya hobennan na camp di kazerne.”

Hopi no tin plan pa escape

E charlanan cu cuerpo ta organisa ta enfoca medidanan cu por wordo tuma pa preveni cu un candela por pasa na cas. “Por ehempel mester evita di pasa extension cord den stopcontact patras di cashi of bou sofa. Esaki por bira cayente y causa candela”. Pero tambe Cuerpo di Bombero ta enfatisa cu ta hopi importante pa no laga belanan cendi na cas sin por supervision. “Ami mes ta un di e personanan cu mester a cambia custumber di laga bela pa Santo despues cu sali di cas. Esaki mester wordo paga.”

E reto di conscientisacion pa Cuerpo di Bombero ta bay te hasta mas aya. Un ehempel cu sr. Ponson ta duna ta cu hopi casnan no tin un plan di escape en caso cu tin candela. Na mes momento negoshinan hopi biaha ta pata pata cu camara pero sin un smoke detector den bista. “Un smoke detector por preveni pa candela grandi sosode facilmente.”

Sr. Ponson ta curasha empresanan pa inverti mas den prevencion di candela, pasobra ‘ta miho bo perde aki aya un prenda cu henter bo establecimento’.

Alabes ciudadanonan mester preveni di tene boter di gas paden di cas, pa motibo cu esaki por trece un riesgo grandi pa e hogar.

Envolve comunidad cu actividad di bombero

Emeli Jenga, kende tabata parti di formacion di Fire Prevention Week na Biblioteca Nacional, ta conta Bon Dia cu e por a wak cu e muchanan a keda fascina cu e informacion detaya cu brandweer a brinda hobennan durante e 2 simannan di e Fire Prevention Week. “Ami mes tin un yiu di 6 aña y el a gosa di e splicacion detaya cu nan a duna di loke nan trabou ta encera. Te hasta e truck a yega bibliotheek y e muchanan a haya tur detaye di con e truck ta traha.”

Sra. Jenga ta haya e organisacion di e parada hopi importante pa envolve comunidad den dje. Esaki sr. Ponson tambe ta spera cu lo sigui cu nan mirando cu ‘antes nos tabata haci esaki den barionan, pero awo nos ta purba mas den ciudad’.

Aunke bo no ta tende hopi di Cuerpo di Bombero, segun sra. Jenga nan trabou ta sumamente importante pa comunidad. “Ora nan wordo yama nan ta pone nan bida den peliger y mi ta kere ta tempo pa nos pone mas aprecio pa esaki.”