Anuncio di e aumento di tarifa di awa a cay manera un sorpresa completo pa comunidad. Pa gobierno esey tabata menos, ya cu tabatin deliberacion andando cu e empresa estatal, WEB Aruba NV, tocante e necesidad di aumenta tarifa di awa. Esaki pa por atende e situacion global di aumento drastico di prijs combustible, cu a toca na nos porta tambe. Inmediatamente a pidi e compania pa warda un rato cu e aumento y esey a sucede tambe.

Sin embargo, pospone no ta bay cambia e situacion. E compania no por sigui absorbe e aumento di prijs di Heavy Fuel Oil (HFO) cu te awor ainda ta e fuente principal di energia necesario pa genera electricidad y awa.

Berdad ta cu no tabatin mester di e sorpresa. Tur hende cu ta sigui noticia internacional sa cu no solamente tin un guera andando na Ucraina, cu efecto devastador pa economia di hopi pais; nos ta na altura tambe cu e no ta bay ta algo pasahero, cu ta brinda perspectiva pa mehoracion a corto y mediano plazo. Y tur esaki no ta keda limita na awa (y coriente) so. Tur cos ta birando mas caro y esey tin su logica. Combustible ta importante pa tur sector y tin influencia na varios momento. Den sector agricola por ehemplo, aumento di prijs di petroleo ta influencia costo di produccion, di transporte y di comercializacion final. Ademas nos tin e parti gubernamental cu ta cobra ‘na porta’ pa tur mercancia cu ta drenta nos pais. Tabatin suplica pa gobierno tene na consideracion pa no mantene e metodo actual pa cobra impuesto di importacion y accijns riba e suma mas halto a base di ‘CIF’ (Cost, Insurance, Freight) sino recuri na cobra a base di e principio di ‘FOB’ ( ‘Free on Board’). Asina lo haya menos entrada, aunke e mercancia ta bin caba cu su prijs aumenta. Nos no a tende nada mas…

Un motibo logico pa gobierno ta cu na e momento aki ta dificil pa permiti e luho di perde entrada considerable. A caba di presenta un presupuesto cu un deficit di mas di 200 miyon florin, y mustra mas benevolencia den e asunto aki ta implica automaticamente fia mas placa pa cera aña, aumentando e debe publico mas ainda. Finalmente, esun cu mester paga e debe extra ey ta e mesun ciudadano cu ta sclama pa busca un forma pa alivia e aumento di costo di bida actual. Ademas, gobierno no ta den e posicion pa unilateralmente dicidi cu na e momento aki ta bay fia mas pa suaviza e situacion pa e ciudadanonan di menos recurso, pasobra tur prestamo na e momento aki, tambe esunnan riba mercado local, ta mara na aprobacion Hulandes. Asina anto, no tin caminda di sconde…

Tambe mester considera cu gobierno mes tambe por spera menos entrada e aña aki, si no bin un cambio drastico den e situacion internacional. Cu prijsnan aumentando, y un poder di compra general cu no lo crece tanto, nos lo por bay mira un reduccion di entrada pa gobierno. Y parti di e consumo reduci lo ta consumo di awa tambe. Di e manera aki e aumento di tarifa di awa no ta bay soluciona e problema actual completamente, pero ta percura pa por sigui produci awa.

E pregunta ta naturalmente si no tabatin otro alternativa pa evadi e aumento di prijs di awa y coriente. Tin alternativa pero nos tin varios aña cu practicamente nada no ta move. Esey no ta conta solamente pa gobierno desde 2017, pero durante e periodo anterior tampoco a logra tanto. En todo caso, cifranan disponible riba website di WEB mes ta mustra cu produccion di energia renovable a ‘peak’ na 2015 (18,9%) y actualmente ta na 11,2% so. En cambio produccion a base di combustible fosil (HFO) tabata mas abao na 2015 (3664 bari pa dia) y actualmente ta riba 4000 bari, y ta representa 88,6% di e produccion. WEB ta birando mas caro anto, pero no ta mehora riba tereno di reduci uso di combustible fosil. Y esey no ta un critica riba e compania sino mas bien riba maneho gubernamental cu ta basa riba escogencia di e alternativanan robez.

Por ehemplo, a scoge pa cambia di HFO pa gas natural, pero ta topa awor cu e problema cu ta dura varios aña pa gas natural ta den operacion y ademas e corelacion di prijs a cambia fuertemente. E mesun crisis actual aki a haci cu pa hopi aña gas natural no ta mucho mas barata cu petroleo, pasobra e demanda den mercadonan clave manera Europa a crece rapidamente y ta conduci na un exportacion masivo di gas natural, e.o. Mericano, pa yuda resolve e escasez cu ta menazando a causa di e problema cu Rusia. E idea cu aki algun aña nos lo tin gas natural relativamente barata disponible ta birando dia pa dia mas un ilusion.

Y, mientras tanto, kico nos ta haci riba tereno di energia renovable, pa sali di tanto petroleo como gas? Na 2021, segun cifranan di WEB mes, energia di biento a contribui 10,3% y energia solar a contribui solamente 1% den henter aña. Kico ta pasando cu nos parkenan solar? Y kico ta sucediendo cu energia solar di productor priva mediano y chikito? Tin un maneho pa esey ainda? Nos por cuestiona gobierno pa e prijsnan halto actual, pero ki dia ta cuestiona e maneho strategico invisible?