Pa diabierna awo 12 di april partido AVP a convoca un marcha nacional cu e intencion pa baha gobierno y yama eleccion nobo. Segun e partido mas grandi den oposicion, nan ta di opinion cu pueblo no por sigui carga mas medida di e gobierno actual. Den cuadro cu esaki, Bon Dia Aruba a tuma contacto cu vocero di Cuerpo Policial Lito Lacle pa haci pregunta riba e preparacionnan cu nan ta haciendo pa e marcha aki.
E vocero di Cuerpo Policial a cuminsa na splica cu na momento cu Cuerpo Policial ricibi un peticion asina, nan ta cuminsa prepara di un siman adelanta. Nan ta reuni internamente y tambe cu e persona/grupo cu a haci e peticion. E ta sigui splica cu Cuerpo Policial tin un structura Hulandes cu nan ta uza pa e tipo di evento asina.
Nos a puntra e vocero si lo haci uzo di extra personal di cual e ta contesta cu si. Sr. Lacle: “Extra personal lo wordo uza y semper nos lo keda den bon contacto cu esun cu tin e permiso ariba su nomber y cu Gobierno tambe pa tur cos keda cana bon.”
E marcha ta programa pa tuma luga entre 4’or cu 7’or di atardi/anochi y e ruta ta di DOW pa bay dilanti Bestuurskantoor y djey bek pa DOW.
