Cuerpo Policial Aruba, conhuntamente cu Wardacosta, a informa cu nan ta bay ta controlando diadomingo awor 21 januari 2024 pa e actividad di Boat Fest na Nikki Beach.
Mediante un comunicado di prensa, a señala cu e permiso duna pa e actividad aki ta cuminsa for di 11or di mainta pa 6or atardi.
Wardacosta su patruyanan hunto cu Maritiem Politie di Cuerpo Policial Aruba ta bay ta riba lama pa controla constantemente y hunto nan ta bay percura pa e siguridad di e evento.
Di su parti, e organisadonan di e evento Boat Fest tambe ta responsabel pa percura pa e siguridad di e publico presente.
Nan tambe ta confirma cu tambe na cualkier momento por controla e documentonan necesario cu e doño di boto mester tin cune, por ehempel: Vaarbewijs valido, documento di e boto cu ta stipula loke ta rekeri pa nan tin riba boto, manera entre otro: life jacket pa cada persona, coy paga candela etc.
Nan ta haci un peticion na publico presente pa mantene nan mes na e reglanan relaciona cu e cantidad di persona cu ta permiti riba e boto segun e documentacion ta stipula.
Igualmente nan ta pidi pa e publico pa disfruta di e dia pero cu mester tene na cuenta cu uzo di alcohol y tene consideracion cu hende riba lama, mirando cu ta bay tin aglomeracion di hende y boto.
Polis riba tera lo pasa controla constantemente pa asina mantene e siguridad riba tera.
Pa finalisa, nan ta recorda cu pa 6or di atardi e evento ta bay stop y esaki ta nifica cu mester paga tur musica, ademas nan a señala cu hefe di districto di Cuerpo Policial di Oranjestad a reuni cu esnan encarga cu e evento pa asina repasa den e rekisitonan poni den e permiso.
