Cuerpo Policial Aruba tabatatin e tarea un biaha mas pa compaña nos muchanan durante Parada di Fantasia. Bou di guia di comisario suplente De Mey hunto cu hefenan di Warda di Polis San Nicolas a reuni y delinea algun punto di importancia den Sala di Agnes prome cu subi caya.
Tabata pa 02:09pm cu e Parada a cuminsa oficialmente conhuntamente cu KPA y pa 05:50pm e cabes a yega na e final y e parada a caba pa 06:28 na Joe Laveist Sportspark.
Por a conta cu 0 detencion durante Parada di Fantasia. Adultonan a comporta y nos chikitinnan a celebra y ta di aplaudi!
Pa KPA mes a conta cu un team dinamico y cu energia cu a subi camindanan di San Nicolas pa orden publico. A conta den total di 101 personal riba pia e parada aki. Esaki ta conta cu tanto polis uniforma, aspirantnan di Scol di Polis, Flex team, K9-Unit, Commando Mobiele, Slachtofferhulp, personal administrativo, Mobiele Eenheid y CEA.
KPA ta satisfecho cu e comportamento y ta desea di mira esaki pa e siguiente paradanan cu ta biniendo nos dilanti!
Motor Unit cu control despues di parada: apenas un detencion pa core bao influencia
Unidad motorisa di Cuerpo Policial Aruba tabatin nan control di trafico despues di parada di Fantasia. Na diferente puntonan strategico nan a para y haci nan control di trafico.
100 chauffeur a wordo controla di cual mayoria, pa no bisa tur, tabatin nan Amigo Responsabel ta manehando e vehiculo.
Tabatin solamente 1 chauffeur bou influencia di alcohol cu a wordo deteni.
Cuerpo Policial Aruba ta sumamente satisfecho cu e comportacion di e chauffeurnan y nos ta gradici nan pa nan tin nan Amigo Responsabel! Ta di aplaudi e comportacion sublime aki pa un trafico sigur pa un y tur!
Celebra consciente pasobra den 71 KPA t’ey presente!
