Den transcurso di añanan, a tuma luga diferente caso cu ta involucra miembronan di Cuerpo Policial den cual ta keda cuestiona e integridad den e instancia importante aki: e ultimo caso a tuma luga diasabra ultimo.

Den algun di e casonan, a bira conoci cu conscientemente un miembro di Cuerpo Policial a pasa informacion y potret di su coleganan pa un organisacion criminal cu ex-minister Paul Croes tabata encabesa; den otro caso, dos polis a plania y a haci intento pa horta y drenta  wappen kammer di warda di polis Oranjestad; un otro caso tabata di varios miembro di polis cu tabata ‘dal drinks’ durante ora di trabao; otronan a drenta den cas sin un orden hudicial y pone pistol na cabes di ciudadano pa su otro colega polis por a listra e cas ilegalmente; y den otro caso, no menos importante, hasta abuso sexual a ser cometi den auto di polis. Tur e casonan aki lo keda atacha integridad di Cuerpo Policial.

Paola Kock

Paola Kock ta un ex-funcionario policial cu den e dianan aki ta den medionan di comunicacion atrobe.

Medionan di comunicacion cu ta defende Kock ta insisti cu ta pa motibo di un persecucion politico di minister di Husticia, Rocco Tjon, cu Kock a ser a kita for di trabao. Pero e caso aki no ta trata di un persecucion politico sino di un alto ex-funcionario cu conscientemente a dicidi di duna e baho mundo informacion di su propio coleganan, specificamente den caso Ibis segun loke e sentencia di HOF AUA2021H00025 ta señala.

Kock a cuminsa traha na Cuerpo Policial desde 1996, su delaster funcion  tabata Hoofd  agent eerste klasse. Kock no ta tabata forma parti di e caso IBIS di ex-minister Paul Croes, pero dia 27 di maart 2016, hues comisario conhuntamente cu Landsrecherche y RST a haci un entrada hudicial na Croes su cas, unda tabatin sospecho di draai un organisacion criminal. E anochi despues di e entrada hudicial, Kock hunto cu su esposo a dicidi di bay bishita Croes, unda conscientemente el a duna informacion confidencial, potret y nomber, exponiendo su mesun compañeronan di polis na peliger, aunke e peliger ey no a materialisa su mes.

Ronald Paskel, Roselynn Angela y Elaine Lacle

Segun medionan di comunicacion local na aña 2013, a reporta cu e tres ex-agente policial aki a tuma husticia den nan man. Lacle a perde su brommer y via via nan a tende unda e brommer por tabata. Den esaki, Ronald Paskel cu Roselynn Angela y Elaine a dicidi cu nan mes ta bay drenta arma den e cas pa busca e brommer. Aki ta unda cu Paskel a saca su pistol, pon’e riba un di e persona su cabes, y e otro polisnan a listra e cas sin un orden di hues comisario. Pa colmo nan no haya e brommer na e sitio unda nan a drenta ilegalmente.

Eduardo Romolo Bremo 

Den e caso aki, cu ta di e sentencia AUA201701729, ta trata di un ex-polis cu a kda condena pa abusa sexualmente di un dama Venezolano. Bremo, den uniforme di polis, a bay busca e dama aki, kita su paspoort y bis’e cu e ta indocumenta, cu e tin cu acompañ’e na warda di polis. Pero e realidad tabata otro, e agente Bremo a hiba e dama otro caminda na Ponton y a abusa sexualmente di e dama en cuestion. Tambe a verduister 60 patron di bala propiedad di Cuerpo Policial, atachando imagen di Cuerpo policial.

Investigacion andando den caso di accidente involucrando polis diasabra madruga

Diasabra ultimo, a bira conoci e noticia di un funcionario di Cuerpo di Polis di Aruba cu a keda envolvi den un accidente di transito unda supuestamente, otro medionan local a sigura cu e funcionario tabata bao influencia di alcohol y a nenga pa keda deteni despues cu a causa e accidente.

Den e caso aki, ta trata di un funcionario cu un rango halto di Cuerpo Policial di inicialnan K.P., kende tabata stuur un auto di trabao y dal otro auto cu tabata staciona. Segun e mesun medionan local cu a reporta esaki, a señala cu e polis en cuestion a supla y e nivel di alcohol tabata mustra cu tabata intoxica, mas e no a keda deteni.

Un hecho cu a causa mal contento den comunidad, mirando e caso serio aki na unda ta trata di un polis di rango halto cu mester duna ehemplo na comunidad, caminda ta bin dilanti e dicho “si bo ta bebe, no stuur.”

Mediante un comunicado di prensa diasabra ultimo den oranan di atardi, Cuerpo di Polis di Aruba a informa cu nan ta lamenta e sucedido di diasabra madruga cu e colega di nan, como tambe e otro coleganan cu tabata na e sitio.

E caso aki ta wordo tuma na serio.

“Como polis nos ta mester duna un bon ehempel pa e comunidad. Vooral den funcionnan cu ta rekeri esaki. Nos ta compronde tambe e sentimento y emocion rond di e sucedido aki.”

Nan a bisa cu nan ta bay actua transparente y consecuente.

Mando policial a tuma medidanan interno pa cu e colega envolvi den e caso aki. Den colaboracion cu Ministerio Publico a cuminsa un investigacion, manera altocomisario di polis Sr. Ramon Arnhem, a señala.

Igualmente a bira conoci cu e funcionario envolvi a keda suspendi di su funcion.

Esakinan ta diferente caso cu a tuma luga unda miembronan y ex-miembronan di polis ta y tabata involucra cu ta importante pa comunidad haya sa y cuestiona e tipo di actuacionnan aki.