Den e analisis haci pa CAft di KPA, KIA, Aduana y Brandweer, a haci entre otro un analisis di e cantidad di personal manera esaki a subi o baha durante e ultimo añanan, compara cu e ausencia pa enfermedad (AO), y e cantidad di overtime. Den e articulo aki nos ta enfoca riba cuerpo policial, pa despues den un siguiente articulo dedica atencion na e otro servicionan.
Cuerpo policial ta e consumidor mas grandi di overtime, loke no ta nada straño pasobra den cantidad di personal e cuerpo ta mas grandi cu e otronan (KIA, Aduana, Brandweer) hunto. Ademas e ta e servicio cu mas hende activo riba base di 24/7. Esey no ta implica cu den tur aspecto e situacion den KPA ta esun mas grave.
Ultimo añanan analisa aki (2017, 2018) ta duna un total di net bao di 600 empleado, 596 pa 2018, di cual 534 por ta traha overtime. E resto ta den e rangonan mas halto cu no ta haya overtime. E promedio di ora di overtime pa aña ta 464 ora, pero mester tuma na cuenta cu no tur persona ta traha overtime tambe. En total e cuerpo a traha na 2018 247.6-8 ora di overtime. Den practica, tumando na cuenta vakantie, AO, etc. e cifranan aki ta bisa cu semanalmente cada empleado di polis a traha 10 ora di overtime.
E 150 empleadonan cu na 2018 a traha mas overtime, hunto a tuma na nan encargo 134.545 ora, 54% di e total di ora di overtime traha den KPA. E grupo aki ta yega na un promedio di 20 ora pa siman di overtime. Tabatin cinco empleado cu conhuntamente a yega na mas di 1.400 ora di overtime, pa un promedio di alrededor di 30 ora pa siman cada uno.
Ausencia.
Na 2018 ausencia pa enfermedad (AO), den cuerpo policial tabata na 6,5%, mas abao cu e promedio di gobernacion – cu 15.482 dia y 2.059 notificacion di AO. Promedio di duracion di AO tabata 7,5 dia. Combina cu un frecuencia relativamente abao di 3,12 – gobernacion en total tabata na 5,4 – esey ta duna un ausencia promedio bastante largo. CAft ta haya cu mester haci mas investigacion riba e relacion entre ausencia pa AO y overtime pa averigua kico ta e relacion entre ambos.
Segun dirigencia di e cuerpo mes e problema principal ta e falta di personal, tambe causa pa e extra tareanan cu ta asigna na cuerpo policial, entre otro den cuadro di vigilancia di costa hunto cu Kustwacht. Tambe tarea di acompaña evento, unda e organisacion di evento mester por haci mas cu seguridad priva.
Pero tambe ta reconoce cu hopi empleado ta mira overtime como parti integral di nan salario y ta concerta prestamo na banco a base di nan salario plus overtime. In mehoracion cu por aplica den e forma con ta atende y planifica overtime, segun CAft. No tin un maneho fiho pa atende persona cu frecuentemente ta ausente pa AO.
CAft ta haya e situacion den cuerpo policial preocupante y no sostenible, cu gran cantidad di empleado cu ta structuralmente trahando dos shift. Esaki tin efecto negativo pa nan salud, pero por tin consecuencia tambe pa con nan ta actua durante cu nan ta traha.
