Ayera Cuerpo Policial di Aruba a informa mediante comunicado di prensa cu Atraco Team y Recherche di Noord a haci varios entrada hudicial na diferente adres unda nan a logra haya armanan di candela, municion y basta droga.

Sigur, esaki ta un bon noticia mirando cu den e mayoria di e casonan cu ta bin registrando recientemente, ta trata di hobennan cu nan ta haya ta posee armanan di candela.

Ayera un biaha mas nan a haci un detencion na Bushiri, den e comunicado a informa cu den oranan tempran di mainta di ayera Atraco Team hunto cu Team di Aresto a haci un entrada hudicial na un cas na Bushiri, presente na e accion tabata tin tambe personal di Flex Team y K-9, den e cas nan a detene un sospechoso di inicialnan L.M.A.M.O.

Durante e entrada hudicial a encontra un arma di candela y cantidad considerabel di municion.

Recherche di Noord cu detencion den otro caso di posesion di arma di candela
 Igualmente, ayera atardi nan a informa cu departamento di Recherche Noord conhuntamente cu Team di Aresto a haci un entrada hudicial na un cas na Seroe Patrishi. Durante e entrada hudicial a detene e homber sospechoso C.T.

E caso aki tambe ta den en conexion cu posesion di arma di candela y na e cas a bin encontra cu basta droga como tambe municion.

Mientras tanto, investigacion ta andando y nan no ta descarta cu lo tin mas detencion.

Un bon trabao di departamento di Recherche Noord unda nan ta señala cu trahando incansablemente pa asina soluciona e casonan y tambe kita arma di candela for di caya.

Unit Narcotica a detene 8 sospechoso
 Den un otro entrada hudicial, Unit Narcotica a tene un accion y nan a detene un total di 8 sospechoso. Ta trata di hende homber como tambe hende muhe. Durante e detencionnan aki a confisca bastante droga y placa.

Por a recorda cu 27 di november ultimo, Cuerpo Policial tambe a informa cu recientemente a sosode un caso ora un patruya policial a para un auto pa control na altura di Lerlandstraat. Na dado momento un mucha homber a sali for di e auto y core bay for di e sitio. Despues a haya arma di candela scondi den un cura di un cas den cercania.

Atraco Team a haci nan investigacion y a detene e mucha homber cu a core bay for di sitio di inicial J.R. di 16 aña di edad.

Cu e detencion aki tambe tabata tin dos persona mas envolvi. Den total tres persona ta deteni den e caso di posesion di arma di candela.

Casonan cu arma di candela
Un bashamento di bala 11 biaha riba un auto dilanti misa di Noord, un asesinato di 1 tiro den cabes den area turistico, un drive-by shooting cu a costa bida di un dama canando riba caya, intento di likidacion riba brommer den mondi fierno, esakinan ta algun caso cu a ser cometi entre hoben y menor di edad na Aruba.

Kico ta sensacion di siguridad? (veiligheidsgevoelens)
 Sentimento di siguridad tambe ta referi como siguridad subhetivo. Esaki ta contrario di siguridad obhetivo. Cu esaki nos ta referi na e nivel realmente di criminalidad y molester; e siguridad subhetivo ta indica con hende ta percibi y experencia esaki.

Cifranan riba criminalidad no ta bisa tur cos, cifranan di criminalidad ta duna un bista limita riba e sensacion di (in)siguridad di hende.

Siguridad Obhetivo ta loke ta ser midi, loke a pasa na unda crimen di arma di candela na Aruba na 2022 tabatin un total di 131 ofensa di arma, compara cu 84 na aña 2021, estadisticanan di polis ta mustra un aumento den concurencia di posesion di arma entre hendenan hoben, e nivel realmente di criminalidad di arma di candela a aumenta esaki.

Sentimento di siguridad den nos hendenan local na Aruba ta subhetivo, debi cu tin indicacionnan cu ciudadanonan no ta sinti nan mes sigur mas mirando cu ta mas cu logico cu crimen di arma di candela ta aumentando, prensa ta haciendo su trabou di reporta esaki pero Gobierno di Aruba no ta haci ningun investigacion oficial pa asina haya sa con e pueblo di Aruba ta sinti pa loke ta trata siguridad.

Mirando e tiramentonan aki, e situacion a cuminsa yega hopi cerca di nos pilar economico cu ta den e area turistico di High Rise cu sigur lo tin su efecto si algo mester pasa cu un turista si e ta ser herida of asesina, e sensacion di siguridad di e turistanan cu ta bin Aruba lo ser midi despues cu e desgracia lo pasa. Cu desaparicion di Natalee Holloway na 2005 a surgi un atencion di media na Aruba, e atencion aki tabata tin consecuencianan significante pa e economia di Aruba lo cual a traduci na un efecto negativo riba economia di Aruba, entre 0,5 y 2,1 porciento di e GDP di Aruba nominal pa e aña 2005 y entre 2,5 y 4,0 porciento di e GDP pa e aña 2006.

Preocupacion grandi riba loke ta trata posesion y uso di arma candela
 Na Aruba, tin un preocupacion grandi riba loke ta trata posesion y uso di arma candela. Regularmente, ora di atraco ta usa arma candela. Cada aña tin victimanan fatal door di uso di arma candela. Cada aña Ministerio Publico ta persigui mas o menos 100 sospechoso pa tin arma candela den nan posesion. Na Aruba ta relativamente facil pa haya un arma di candela.

Den diferente yegada di lancha for di Venezuela, nan a confisca nan y Venezuela ta 50 kilometer leu di Aruba, cu un boto rapido por cubri e distancia den 1 ora mas o menos, tur cos ta depende e tempo.