Cuerpo Policial Aruba ta celebra su 36 aniversario

Desde cu Aruba a haya su Status Aparte, Cuerpo Policial Aruba a keda funda. E tempo ey a cuminsa cu menos di 200 polis. Mayoria polis tabata di ex-Antiyas Hulandes e tempo ey. Den feliz memoria ex-altocomisario di Polis Sr. Ronald. W. Peterson tabata tin e tarea pa forma polis y forma un cuerpo den un etapa nobo como pais autonomo den Reino Hulandes.

For di e tempo ey Aruba a conoce su prome agentenan femenino cu tabata Sra. Marlen de Cuba-Giel y Sra. Gerda Williams. Alabesa conoce e prome wardanan di polis cu ta di Oranjestad cu a wordo traha na unda ta awe Renaissance Hotel y warda di Polis San Nicolas. Ambos tabata e wardanan oficial despues di 1986. For di e tempo ey Cuerpo Policial Aruba a mehora, a expande, a conoce cambio y e organisacion a bira mas grandi. Cu trabou duro nos por mira for di unda KPA a cuminsa, con ela gatia y unda nos ta mira nos mes pa futuro.

Awendia nos por conta cu mas o menos 600 polis y personal administrativo cu ta brinda seguridad na nos pueblo. Ta trata aki di agentenan trahando den 4 districto, cu ta warda di Polis situa na Oranjestad, Noord, San Nicolas y Santa Cruz.

Durante aña nos por conta cu diferente unidad special cu ta forma parti di Cuerp Policial manera: Unidad motorisa, Unidad Canino, Team di aresto, Mobiele Eenheid, Duik Team, Kust surveillance, Helicopter unit, Surveillance, Team Drugspanden, UGC y e departamentonan conoci di recherche cu ta bon entrena y capacita pa investiga y soluciona casonan mas complica.

Durante aña Cuerpo Policial Aruba su nomber ta wordo reconoci cu hopi respet internacionalmente entre otro manera Interpol, DEA, FBI, RCMP, Force Protection Agency, ACCP y IACP. Tambe trahando den cooperacion estrecho cu Cuerpo di Polis di Reino Hulandes manera, Korps Politie Rotterdam, Rijmond, KLPD, RST, Korps Poltie Curacao, Korps Politie Carabische Nederland y mucho mas.

Comunidad por ta orguyoso di su Cuerpo Policial Aruba awe. 36 aña di crecemento y lo sigui crece cu bista rib’a futuro. Pabien na cada un colega policial y personal administrativo cu ta haci nan trabou cu dedicacion, tempo y pasion pa brinda lo mihor pa pais Aruba. Sin lubida danki na cada famia pa nan aprecio, comprension y sosten na cada polis cu ta sirbi nan pais.