Cuerpo di Polis ta pidi pa hobennan no practica weganan peligroso di internet

Un reto viral nobo a cuminsa bira famoso cerca muchanan di scol den ultimo dianan aki, cu ta denomina ‘Rompe craneo Challenge’. E tendencia nobo aki a hiba varios hoben pa comparti video na rednan social, por ehempel Tik Tok, pa mustra e caidanan di cual nan ta obheto.

Na otro luga di mundo, esaki ta consisti cu tres persona para banda di otro ta cuminsa bula y un of dos hoben para na banda ta haak e otro hoben, loke ta causa cu e ta cay riba su lomba.

Hopi leu di ta un acto balente, dokternan a señala e iresponsabilidad cu cual muchanan y hobennan ta haci cu e acto aki, locual no ta considera como wega. Ademas e caidanan violento por produci fracturanan, convulsion, sangramento, como tambe un daño den celebro na largo plaso como epilepsia of e hasta morto.

Cuerpo di Polis di Aruba pa via di su vocero Lito Lacle a duna di conoce cu nan a tuma nota di diferente videonan riba rednan social di weganan peligroso cu ta wordo hunga door di mucha of hobennan. Di mesun manera nan a pidi e hobennan cu ta practica e wega aki pa stop inmediatamente.

Alabes, Lacle a enfatisa cu na Aruba ainda no ta existi personanan herida pa via di e wega aki, pero e acto por wordo considera como maltrato severo y tin castigo di prizon mara na dje. Ta alerta henter comunidad y mayornan cu Polis ta tumando casonan hopi na serio pa actua debidamente.

Na Corsou e caso ta otro, riba pagina di Facebook ATK News di noticianan di Corsou, a publica e caso di un mucha, cu no a specifica su edad, cu a haya ‘zware hersen schudding’. E mucha a cuminsa saca y segun loke un voice note di un persona a bisa, e scol a neglisha e situacion.

Retonan viral a bira un di e peligernan mayor di internet pa esunnan mas hoben den sociedad. Bao apariencia di weganan simpel y inofensivo ta sconde un riesgo grandi pa mucha y hobennan.

Pa via di esaki ta pidi encarecidamente pa mayornan, docentenan di scol y muchanan mes tuma nota y consenshi riba e weganan aki, cu por causa e morto di algun compañero of amigo. Den algun scol a cuminsa caba cu charla educativo pa splica loke por pasa cu nan y asina nan por compronde cu por trata di un wega fatal.