Mirando cu paradanan di carnaval ta atrae basta hende y algun biaha chauffeurnan no tin caminda pa para nan auto, Cuerpo di Polis ta haci un peticion pa sigui reglanan di trafico.
Mediante un post riba rednan social, specificamente pagina di Facebook di Korps Politie Aruba, a publica cu “no ta permiti pa blokea sitio ubica pa vehiculo di emergencia.”
Cuerpo policial ta splica cu tin luganan ubica specialmente pa vehiculonan di emergencia manera ambulance, polis, brandweer y CEA.
No ta permiti pa blokea, reserva of pone cualkier obheto pa stroba personalnan di emergencia pa haci nan trabao.
Di mesun manera, mirando cu Aruba ta den su temporada di carnaval, tin chauffeurnan cu no ta haya luga pa nan por para nan auto, pero den esaki, mester ta cauteloso pa motibo cu nan ta recomenda di no para auto den scuridad, no laga ni un obheto di balor aden y dobel check y lock e auto pa asina ta mas sigur.
Tambe, mester tene na cuenta cu Agentenan policial di Planologie t’ey despues di parada pa dirigi e trafico, trahadonan di DOW cu su trucknan geel tambe t’ey pa asina kita e baricadanan despues di e parada, siguientemente ta bin e trahadonan di SERLIMAR cu despues di parada lo sa di haci tur e cayanan limpi.
Potretnan ta di Cuerpo di Polis di Aruba su pagina di Facebook.
