Mediante un entrevista cu redactor di Bon Dia Aruba a haci cu presidente di Sindicato di Polis di Aruba (SPA) Rodney Solognier a bin dilanti e preocupacion cu nan tin pa loke ta trata escasez di material den cual a informa cu nan ta wardando pa bulletproof vestnan cu a wordo priminti pa comienso di e luna aki.
Solognier a señala cu te ayera dia 16 di maart, Cuerpo di Polis te ainda no a ricibi 200 bulletproof vest cu a wordo priminti pa dia 2 di maart: “mi a tende—pero no ta nada oficial—cu tin 25 so ta yegando pero esey no ta e palabra, esey no ta lo cual nos a palabra. 200 bulletproof dia 2 di maart y awor mi ta tende un redo di 25 so ta bin y despues e restonan, mi no ta compronde dicon e cosnan ta bira asina dificil,” el a sigura.
Mientras tanto, minister di Husticia Rocco Tjon a bin reuniendo cu Cuerpo Policial durante varios dia pa scucha nan preocupacion y mal contento na unda dia 7 di februari mediante un video cu a wordo publica riba su rednan social el a sigura cu “den e tematica di bulletproof nos a mustra sindicato cu ya caba tur cos ta paga, nos a mustra nan e carta tambe ki dia e vestnan aki lo wordo entrega di un carta cu nos a ricibi di e compania na Merca mes y esaki ta un preocupacion cu nan tin,” minister Tjon a sigura.
Tabata na augustus di aña 2022 cu e proceso di midi cada funcionario den Cuerpo di Polis pa cu e bulletproof a cuminsa despues cu nan mes a haci e escogencia manera un otro publicacion di minister Tjon a sigura.
Cuerpo di Polis ta sigui den espera di e material importante aki cu ta pa nan mesun siguridad ora nan ta na pia di trabou.
