Tabata dia 14 di juli ora diferente medio di comunicacion a reporta un accidente fatal na Havenstraat den oranan di anochi, na unda tabata envolvi dos auto y debi na heridanan basta grave cu e accidente a causa den un persona cu tabata coriendo den un di e autonan aki dianan despues el a muri.

Pa esaki, Cuerpo di Polis a informa ayera atardi cu riba 14 di juli 2023 pa mas of menos 10:50 di anochi tabatin un dalmento entre dos auto den Havenstraat na Oranjestad. Den e accidente aki un di e chauffeurnan lamentablemente a perde su bida. Tras di e dos autonan tabatin un chauffeur di brommer ta bin, cu probablemente tabata testigo di e accidente. Ta pidi e chauffeur di brommer como tambe e dama bisti na blanco para riba trottoir pa tuma contacto cu polis.

Koninklijke Marechaussee ta investigando un accidente di trafico cu consecuencia fatal cu a tuma lugar den Havenstraat na Oranjestad. Alavez ta haci un suplica si tin mas testigonan cu a wak e accidente, pa tuma contacto mas pronto cu ta posibel cu tiplijn di polis cu ta 11141 of por manda un Whatsapp na polis di trafico via number 597-5191.

Hechonan
 Hawin Harold J. Ruiz di 31 aña di edad, ken diabierna 14 di juli ultimo a keda involucra den un accidente fatal na districto di Playa.

Mediante un comunicado di prensa, Cuerpo Policial ayera diadomingo a informa comunidad cu pa 10:56pm central di polis a haya e notificacion di un accidente entre dos auto na altura di Boolchand’s den Havenstraat na Oranjestad.

Polis a señala cu na yegada di patruya a topa cu e chauffeur di e auto Suzuki color shinishi gravemente herida unda a pidi ambulance cu maximo urgencia y na nan yegada e personal di ambulance a stabilisa e victima y transport’e mesora pa Dr. Horacio Oduber Hospital.

Na e sitio di e sucedido a presenta specialistanan di trafico, polis tecnico, fiscal y departamento di slachtofferhulp.

Diasabra 15 di juli despues di 11’or di anochi, polis a haya informacion cu e chauffeur involucra di accidente a fayece na Hospital.

Dokter a constata morto di e homber yama Hawin Harold J. Ruiz, naci na Aruba, dia 26 januari 1992 e cual lamentablemente a bira e di seis morto den trafico pa aña 2023.

Cuerpo Policial a informa cu e caso ta bao investigacion y e curpa a keda confisca riba ordo di fiscal. Alabes tin un persona deteni den e caso aki.

Esaki ta otro tragico accidente cu ta tuma luga na unda otro persona hoben a perde su bida, tabata dos siman pasa tambe ora otro persona di 37 aña tambe a keda involucra den otro incidente fatal.