Cuerpo di Polis di Aruba ta buscando informacion di un caso lamentable. Ta trata di un feto humano haya diadomingo 10 di maart cerca di Natural Bridge. Nan ta pidi colaboracion di comunidad pa cu esaki.
Mediante un comunicado nan a señala cu diadomingo 10 maart 2024 pa 1.05 di atardi, central di polis a haya notificacion di un persona cu a bin contra cu un feto.
E prome informe cu central di polis a haya ta cu segun e personanan e ta mustra di ta trata un animal morto y e tabata dera den santo pero nan no tabata sigur.
Central di polis a despacha patruya na un rancho na “Piedra Cora” situa banda di caminda poco prome cu yega Natural Bridge.
Ora patruya a yega na e sitio menciona, a confirma cu di berdad tabata trata di un feto morto lora den paña.
Mesora a dirigi e ekipo forensico di polis na e sitio y ta bin constata cu ta trata di un feto humano y no un feto di animal.
E mesun dia pa 2:30 atardi fiscal a laga tuma e feto pa investigacion, dia 11 maart 2024 Dr. Texier a haci autopsia riba e feto y a constata cu ta trata di un feto masculino di mas o menos cinco pa seis luna den desaroyo y cu ta trata di un caso cu lo mester a pasa sea un of dos dia prome cu 10 maart 2024.
Polis ta indica cu si tin cualkier persona cu sa algo of a mira algo di e caso por yama departamento di Jeugd- en Zedenpolitie (J.Z.P.) na 281 3180 of tambe por yama na tipline di polis na number 1114, nan ta sigura anonimidad di e persona.
