Riba e red social Instagram, a cuminsa bira tendencia e accountnan unda personanan ta manda nan opinion y/of comentario riba un situacion y/of persona specifico y esey ta ser publica riba e red social di manera anonimo, un trending cu ta birando viral na varios pais y cu awor ta na Aruba unda Cuerpo Policial ta adverti riba esaki.
Mediante un comunicado pa prensa, Cuerpo di Polis di Aruba ayera diabierna atardi a sigura cu “Nos no ta tolera violencia” y nan ta adverti seriamente tocante rednan social.
Den e ultimo dianan Cuerpo Policial di Aruba a bin ta tuma nota di un pagina social riba Instagram cu yama “auaconfessions2.0”.
Den un forma anonimo cierto comentarionan ta wordo publica riba e pagina aki.
Cuerpo di Polis a tuma nota di cierto comentarionan cu por ta castigabel pa ley y cu por tin consecuencia grave pa esnan cu ta publica e comentarionan serio como tambe pa e moderador di e pagina aki.
Cuerpo Policial di Aruba ta manda un advertencia fuerte na cualkier persona cu ta usa e rednan social cu no lo tolera tipo di comentarionan cu contenido di violencia mirando cu esaki por tin consecuencia serio y negativo pa esnan envolvi.
Cuerpo Policial na su turno tin atencion riba tipo di paginanan aki cu nan contenido cu por ta castigabel pa ley manera menciona y sigur lo bay actua contra esakinan.
Investigando riba loke tin publica riba e cuenta aki “auaconfessions2.0” e cual te ayera tabatin 717 follower, den profile a bin haya un Google form unda esnan interesa ta yena e formulario y laga sa nan pensamento vooral riba un persona, den su mayoria, ta trata di studiantenan di scolnan secundario unda nan ta skirbi diferente mensahe pa otro studiantenan cu por resulta bullying of hasta un confesion di sentimentonan romantico.
