ORANJESTAD – Ainda e demotivacion ta reina den cuerpo di Duana. A pesar cu hues a dicidi pa e partidonan sinta na mesa pa resolve nan diferencia, y atende e demanda di e duaneronan pa medio di nan sindicato SADA, te ainda nada concreto a keda soluciona. E aña nobo a start y no ta wordo mira cambio concreto pa loke ta trata mehoransa den cuerpo di duana.

Presidente di SADA, Edward Maduro a declara na Bon Dia Aruba cu aunke hues a bisa cu sindicato no por mete den tuma di decisionnan pa locual ta maneho, si nan mester atende nan diferencia. Pa tal motibo, gobierno a dicidi pa Mediador di Gobierno brinda nan intermediacion pa atende e asunto aki y busca un solucion permanente.

A pesar cu nan a sinta un par di biaha cu Mediador di Gobierno y diferente partner, manera departamento di recurso humano (DRH) y directiva di duana y logicamente sindicato SADA, pero te ainda nan no a yega na nada basicamente. Aunke nan a atende diferente tema, ainda algun di nan ta pega. Un di nan tin di haber cu aspecto di siguridad pa e duaneronan. Manera a yega di sali den prensa, SADA tin algun dificultad riba e maneho di e director di Duana pa loke ta trata siguridad personal di e duaneronan na pia di trabou.

Mas siguridad
E tin cu bisa cu nan no ta hayando e debido atencion, ya cu nan tin otro tipo di pensamento riba e tema aki. Pero pa SADA, ora ta trata siguridad di personal na pia di trabou, nan ta kere cu niun hende por ta contra di esaki. A lo menos pa bin cu cierto medidanan pa soluciona e preocupacion rond di siguridad di personal di duana. Cierto desaroyo ta tumando luga den nos region, y nan ta mira cu e director di Duana no ta haciendo nada pa acelera e tuma di decision pa loke ta trata siguridad di nan personal. “Nos no mester sinta warda te ora cu algo pasa…,” el a bisa.

Maduro a indica cu practicamente tur dia, personal di duana ta confronta agresion fisico y verbal pa medio di insultonan na pia di trabou. Pa nan mester atende cu situacion asina, nan mester tin nan material pa haci uzo di nan, pa por actua den caso cu cos ta sali for di man. E ta un asunto cu nan ta referiendo basta tempo riba dje, pero te ainda ta wordo neglisha.

E no ta referiendo unicamente na arma di candela, sino na tur ekipo cu un agente di duana por tin riba su mes, pa atende cu algun situacion delicado di siguridad. Pasobra ora cu nan ta traha, ya sea den terminal aereo of maritimo, pero tambe esunnan cu ta traha cu control di containernan, nan por haya nan mes den situacion cu mester haci uzo di material pa defende nan mes.

Restructura salarial
Un tema cu ta andando for di basta tempo caba tin di haber cu asunto di restructura salarial. SADA ta pusha pa e proceso aki por bay mas lihe. Riba e punto aki, lider di SADA a declara na e matutino aki, cu nan a reuni cu DRH, y e aña aki nan a reuni un biaha mas. Aworaki nan ta na espera di un siguiente reunion ya cu –segun Maduro- a wordo priminti na SADA cu pa final di april, e asunto di restructuracion salarial den e cuerpo uniforma aki mester ta full cla.

Nan kier pa e asunto restructuracion salarial den cuerpo di Duana finalmente por wordo defini pronto, ya cu manera nan a splica SADA, si den dado caso esaki no ta bin cla na april, esey ta bolbe bay ‘on hold’. E lider sindical di SADA ta haya cu esaki no ta promove e entusiasmo bou e trahadonan. Mas bien lo contrario, ya cu nan ta bayendo mas di un aña caba den spera pa realisa e restructuracion salarial. Sinembargo, segun Maduro, nan ta keda optimista ainda.

Na final, Maduro a laga sa cu nan ta keda traha cu un mira positivo. A pesar bo ta haya hendenan cu ta duna comentario ‘for di base.’ E ta kere cu den un perspectiva neutral, cada ken por saca un conclusion cu locual personal di cuerpo di duana representa pa SADA ta bringa p’e, no ta algo fuera di base. Tampoco e asunto aki tin di haber cu politica ya cu su persona for di final 2015 te awor, no ta importa cual gobierno ta sinta, SADA a vocifera nan disgusto ora mester.