10jun, LW, KIA 2 (6).jpg

No solamente den dia tabata tin actividad na KIA, pero durante oranan di anochi tambe. Na ceramento di nos edicion di ayera, a haya tende cu un biaha mas e presonan a cende candela y esey a haci cu personal di KIA mester a tuma e medidanan necesario, naturalmente cu asistencia di Brandweer.

 

Medidanan di siguridad a wordo uza, na momento cu Brandweer a presenta, pa sigura cu nan ta safe ora cu nan ta desplega nan trabao. Esey a sosode den oranan di mainta tambe.

Ferdinand Ponson, kende ta oficial na Departamento di Bombero, a relata kico a pasa den oranan di mainta, caminda cu nan a presenta cu nan unidadnan pa combati e candela y cu ayudo di personal di KIA a sa di maniobra pa hinca e truck den cura di e institucion.

A hiba e bomberonan unda e candela a origina y hunto cu nan a tuma e trabao over di pagamento di candela, cu a cuminsa cun’e y a logra domina e candela den mas of menos 10 minuut.

Personal di bombero a haci uzo di nan mesun truck. Na prome instante nan a bin haya e personal ta uza nan propio medionan di paga candela, pero bombero a uza nan mesun awa di truck.

 

Ponson a splica cu tabata tin daño di candela den e celnan y e mesun unidad di edificio aki, esta e hala, a sufri hopi daño di huma. Pa ora cu bombero a yega, a haya e informacion cu lo tabata tin hende den e cel ainda, pero pa ora cu a yega asina leu, ya tur e presonan a wordo trata. Riot Team, a sigura e siguridad pa e bomberonan por a haci nan trabao.

 

Accion marduga

Cu apenas un siman fungiendo como director di KIA, Rocco Tjong a duna di conoce cu diaranson marduga a tene un accion basta grandi den KIA, caminda varios articulo a wordo confisca, entre otro arma y tambe telefonnan celular.

Ta tipo di accionnan cu el a yega di forma parti di dje den pasado, tempo cu e tabata trahando ainda den Cuerpo Policial.

Diaranson mainta, banda di 8’or, en berdad e detenidonan supuestamente lo a cende algun hala di cel na candela. Sinembargo, tin proceduranan cla den KIA y prome cu tur cos, el a yama e personal danki. El a mira literalmente personal di KIA riesga nan mesun bida pa purba salba bida di algun di e detenidonan y esey ta hopi di elogia, segun Tjong. No ta tur ora tin cu enfoca riba e cosnan malo so. Tin hopi trahado cu ta duna di nan banda y cu ta bay e extra miya. Manera cu por a wak ayera, nan a pone nan mesun bida na peliger.

 

Plan

Awor aki ta trahando cu un plan cu practicamente ta riba papel, den deliberacion cu Cuerpo Policial y CEA. Ta trahando  pa wak precies unda ta bay ubica e detenidonan cu tabata den cierto partinan den KIA cera, pero sinembargo soluciona esaki internamente, y si mester for di servicionan partner na Corsou, St. Maarten of Boneiro si cos bay for di man.

 

Tjong a splica cu 15 persona a sufri daño. Manera tin di compronde di un comision di urgencia cu ta duna conseho cu ta consisti di trahadonan di KIA, e medico y tambe personal di brandweer. Ta trata mas tanto di victima cu  a inhala hopi huma y esey nan a wordo trata pe. En total ta un persona so a wordo transporta pa Centro Medico pa observacion.

Pa loke ta trata e celnan di pasado cu a wordo cendi na candela, pa fin di e luna aki tur ta bay wordo renoba. Nan ta wardando literalmente riba prome di juli pa cuminsa cu full e renobacion ey y awor aki pa loke ta trata esaki, ta prematuro pa bisa kico e daño ta. Kico por a wak na prome instante, no ta nada cu un bon beurt di limpiesa por yuda.

 

El a agrega cu a haya di tur un poco den e razzia. Entre otro arma blanco, droga, telefon celular, etc. Tchong a splica cu mas y mas den husticia, no KIA so, pero tur departamento di KIA, ta trahando hopi mas hunto cu e partnernan y ta mas tanto kier bira un organisacion cu ta wordo guia pa inteligencia, ora cu haya cierto informacionnan, ta actua riba nan. Banda di esey ta parti di e maneho cu inespera lo tene tipo di accionnan aki.

 

Mas trabao pa haci

Rocco Tjong tin mas trabao pa haci. E prome siman el a tuma tempo pa papia cu tur personal, pa asina scucha for di cada un di nan kico ta nan dolor y tambe wak ki posibel solucion cu por tin.

 

Presonan

Tjong a splica cu pa loke ta e presonan, nan no lo ta contento cu e razzia cu a tuma luga. For di investigacion lo haya sa kico ta kico. Un cos mester ta cla, como husticia ta para como un unidad. No KIA so, KPA y CEA y detenidonan no ta bay dicidi e maneho di prizon y sigur lo bay scucha nan.