Tabata april di aña 2021 ora Gobierno di Aruba a informa tocante e solucion cu a bin dilanti pa e construccion di un edificio nobo pa Aduana, cu despues a ser traspasa pa Bohama Aruba N.V pero te ainda, dos aña despues esey no a tuma luga.

Mediante un acuerdo di “swap” a keda dicidi cu lo pasa e edificio bieu di Aduana dilanti Waf na Playa pa Bohama Aruba NV, cu lo construi un compleho di vivienda y na su turno Bohama lo construi e edificio nobo pa Aduana na balor di e edificio bieu. Un edificio cu ya pa hopi aña ta cera y ta sigui bay atras.

E construccion di edificio di Aduana na e tempo ey supuestamente, tabata costa 9,5 miyon florin, unda mester a pone prome piedra na comienso di juni di 2021 pero esey tampoco a tuma luga y tabata pa crea 80 cupo di trabou cu un duracion di 1 aña y mey. Pa realisa e compleho di vivienda a informa cu mester a inverti 45 miyon florin y lo a inicia cu trabounan di sloop na inicio di juni 2021, cu 150 cupo di trabou y tabatin un duracion di 2 aña y mei, segun tabata sigura un comunicado di e parlamentario di partido MEP Shailiny Tromp-Lee.

Na juli di 2022 gobierno tambe a informa cu esaki ta un proyecto cu ta trahando riba dje ya pa un tempo caba y cu den prome siman di juli aki a firma un ‘addendum’ na e declaracion di intencion cu tabatin, pa duna Bohama y pais Aruba 6 luna mas di tempo pa finalisa e detayenan.

Na e tempo ey, mester a haci un valorisacion nobo pa e edificio cu ta bay traha pa Aduana na Barcadera y pa esun cu ta centro di ciudad, pa asina por compara e dos nan hunto y mira si no tin uno cu un balor di mas of di menos.

Si e balor di ambos edificio no ta igual y por ehempel Gobierno duna Bohama un edificio cu tin mas balor compara cu locual cu nan ta traha pa Pais Aruba, e or’ey tin locual cu ta yama ‘schenking’, pa cual lo mester bay Parlamento. Pero si ta dunando Bohama un edificio cu ta di igual balor cu locual cu nan ta bay traha pa pais Aruba, ta un otro situacion, manera prome minister a splica.

Esaki tabata e situacion cu tabata tumando luga na juli aña pasa, unda cu a firma pa continua cu e negociacionnan aki pa e siguiente 6 lunanan, pa por tin un miho bista di e proceso di balor di e edificionan. Consecuentemente lo por informa parlamento di e situacion (parlamento a pidi e informacion aki) y pa despues finalisa e acuerdo cu ta bay tin entre Bohama y pais Aruba.

E situacion aki ta causando na trahadonan cu nan ta sinti nan mes discrimina debi na diferente problemanan cu nan tin caba y cu nan ta bin vociferando cu no ta haya solucion ademas e edificio mester di un inversion grandi ya cu for di basta tempo pasa el a keda bashi bayendo atras den infrastructura y cu awor a ser traspasa na Bohama Aruba N.V pa asina construi un edificio nobo na Barcadera, pero e pregunta ta keda, cuanto mas e trahadonan di Cuerpo di Aduana ta bay keda neglisha?