Ayera den cuadro di Dia Internacional di Aduana, minister di Financia interino, Richard Arends a declara cu e departamento aki ta den un proceso di transicion tambe despues cu a los for di departamento di Impuesto.
E mandatario a bisa cu e inversion cu gobierno ta bin haciendo riba e personal di e departamento aki ta contribui pa e cuerpo aki por bira mas profesional. El a agrega cu e departamento aki ta sumamente importante ya cu nan ta trece un cuarto di gobierno su entrada. Pero no solamente nan tin di haber como generado di entrada pa caha di gobierno; sino cu nan ta esun tin biaha prome yama pa combati ilegalidad, ya sea narcotrafico, importacion y exportacion di materialnan of productonan ilicito.
“Mi ta kere cu e cuerpo aki mester ta orguyoso di nan trabou. No solamente pa loke nan ta nifica materialmente pa pais Aruba; pero loke nan ta nifica pa nos frontera y defende e fronteranan di Aruba.” E ta bisa cu na aña 2013, Duana a independisa birando un departamento cu su propio retonan. Den e periodo aki di 4 aña, Duana mester a carga parti di e servicio y e peso ta bira grandi pa falta di personal. Ademas considerando cu e ta un cuerpo uniforma e ta crece a base di nan experiencia. Tambe riba e parti di conocemento, ya cu nan mester traha a base di ley; y nan mester tene cuenta cu cierto norma di integridad cu ta wordo crea a base di experiencia.
“E sistema cu Aduana ta forma su mes ta un tiki diferente cu otro departamentonan.” Sr. Arends ta sigura cu e departamento aki tin atencion constante di gobierno, pero muy particularmente di e minister titular Angel Bermudez di Financia cu tambe ta un ex duanero cu ta conoce “e dolor di e cuerpo aki.”
