Mirando cu sindicato di Duana no a haya oido cu minister di finanzas, a yama un reunion extraordinario cu nan miembronan awe mainta. Sinembargo awe pa 3 or prome minister a cuadra su agenda pa atende e puntonan di preocupacion di e cuerpo.
Presidente di sindicato di Duana Aruba (SADA), Edward Maduro a declara na Bon Dia Aruba cu mirando cu minister di Finansa, Xiomara Ruiz-Maduro (MEP) no a honra nan peticion pa sostene un reunion cu nan, SADA a dicidi di bin cu un reunion extraordinario cu nan miembronan awe mainta.
Despues SADA ta haya sa cu e mandatario e ora ey si ta reacciona y invita nan pa reuni diabierna awor. Sinembargo den nan reunion extraordinario nan miembronan a pidi pa nan haya atencion inmediato. Ta asina cu prome minister Evelyn Wever-Croes (MEP) a cuadra su agenda pa reuni awe 3’or atardi cu un delegacion di SADA.
E sindicalista Maduro a expresa su gradecimento cu e mandatario encuestion; ya cu SADA tin un lista largo di puntonan di atencion. Entre nan cu personal di duana ta trahando full desmotiva. Tambe nan ta bin cu algun puntonan di preocupacion riba asuntonan cu ta stroba pa mas entrada por drenta den caha di gobierno via Duana. Nan lo bin cu posibel solucion pa atende cu e situacion aki.
