Cubri covid19 bou seguro di biahe complica pa agencia di seguro

Biaha desde Corsou na paisnan cu ta considera como un riesgo ‘averahe’ pa contraccion di e virus ta posibel. Seguronan riba e isla ta kibrando cabes riba e cubrimento di covid den un seguro di biahe.

E problema ta sinta cu si un persona di Corsou biaha bay Hulanda of otro pais, e tin chens cu e por wordo infecta cu e virus. Den e caso di infeccion, tin chens cu no por biaha bek Corsou riba e fecha plania, pasobra ta posibel cu e test di PCR sali positivo en bes di negativo. Ken ta paga esey? Loke ta causa mas preocupacion ta den caso cu un biahero bira hopi malo y mester bay hospital, mirando cu e gastonan pa tratamento medico den intensive care ta enorme. Esey ta wordo cubri cu un seguro di biahe local?

Antilliaans dagblad a puntra Ennia y Guardian Group Fatum si nan ta cubri covid19 pa biaheronan cu tin pensa di bay riba vakantie. Na ambos compania, te fin di juni no tabata posibel pa cera un seguro di biahe pa termino corto y a tuma luga un paro temporal den aceptacion di peticionnan pa seguro di biahe. Guardian Group ta trahando riba un pakete cu ta inclui cubrimento pa covid19, mientras Ennia si desde siman pasa ta brinda un cubrimento adicional pa covid19 den nan seguro di biahe.

E situacion aki, segun director di operacionnan di Ennia Aichel Magdalena, ta un cuestion di calculacion di chens. “Nos ta haci uzo di un model cu ta asumi cierto expectativanan y riesgonan.” A base di esey e compania di seguro a scoge pa 4 opcion, pa cual e gasto diario ta varia di 9 florin te 18.50 pa dia y e suma cu ta cubri ta core di 25 mil florin te 100 mil florin. “E premie diario ta mas halto cu e seguro di biahe normal, pero bo mes por determina cuanto riesgo bo kier core.” Den e prome caso, si un persona por ehempel mester bay tratamento na hospital, e suma maximo di e opcion mas caro no lo ta suficiente pa cubri tur gasto. “E ora ey bo ta sigur 1 siman den hospital y e gastonan ta surpass 100 mil hopi lihe den e caso ey.”

Ennia por cambia e pakete di covid19 inmediatamente y te hasta stop esaki si ta mustra cu tin mas claim cu a drenta cu a spera. Nan por baha of subi e premie tambe, dependiendo di cuanto persona claim. Si un persona no bin bek riba e fecha plania den cuadro di infeccion di covid19, e seguro ta reembolsa e persona pa gastonan di residencia te 14 dia despues.