E aerolinea Aleman Condor a anuncia cu cuminzando 31 di october lo realisa tres vuelo semanal pa Varadero for di Frankfurt y Düsseldorf.
E vuelonan por reinicia despues cu ministerio di Relacion Exterior di Alemania a kita e advertencia general di biaha pa Cuba. E vuelonan lo ta cada diamars, diabierna y diasabra. Ticket lo costa pa trayecto 349.99 euro pa persona, y por haya esaki via e website di e compania, segun un comunicado di e compania publica diamars pasa. E nota ta añadi cu banda di ticket tin paquete turistico dsponible a traves di varios agente di biahe Aleman.
“Alemannan kier sinti nan mes comodo durante vacacion, durante e biaha y na nan destino, pero tambe den tempo di Corona. Cu temperatura Caribense, hotelnan excelente y playanan di ensueño pa landa y relaha, Cuba ta cumpli cu tur requisito, y Condor tin 65 aña transportando su huespednan di manera confiable y sigur (…), “ segun Ralf Teckentrup, CEO di Condor.
E dirigente empresarial a añadi cu e vuelonan ta conta cu gran cantidad di medida a bordo, y cu lo implementa tambe “conceptonan integral di higiena ‘in situ’ den e hotelnan y na aeropuerto di Varadero”.
Siman pasa ministerio di Turismo di Cuba a anuncia cu desde 15 di octobe Varadero por ricibi turista di exterior. Desde comienzo di september tin vuelo turistico pa e zona di e caynan den norte di e pais. E aeropuerto Jardines del Rey, na Cayo Coco, a ricibi dia 4 di september e promer vuelo comercial -procedente di Canada – cu a yega Cuba desde cu a cera frontera pa motibo di e coronavirus.
