Turismo internacional a cay cu casi 20% na januari pasa, compara cu e mesun luna di 2019; un disminucion di 95.856 bishitante, segun cifra oficial.
Den prome luna di aña aki a yega na e isla 393.762 turista, compara cu 489.618 na januari 2019, segun un informe di Oficina Nacional di Estadistica (ONEI). E caida tabata mas serio den e cantidad di bishitante for di Merca, casi 43.000 turista menos. Aña pasa a yega di e pais ey 62.416 bishitante, mientras cu e aña aki a yega solamente 19.464.
Di acuerdo cu e documento, den sentido general e fluho a bira menos di tur mercado, excepto Rusia cu tabatin un aumento di como 8.000, y Canada cu un incremento di mas di 3.000. Canada ta sigui como e principal mercado di turista pa Cuba, cu 162.307 den prome luna di aña, sigui pa comunidad di Cubano den exterior, cu 37.394.
Sin embargo, e cifra di bishitante Cubano di exterior ta representa un caida di 5.558 biahero na januari; aña pasa a yega 42.945. Den e ultimo cinco aña (2015-2019) e fluho di bishitante Cubano na e isla, di cual mas di 80% ta di Estadonan Uni, a mantene un tendencia creciente.
E estadisticanan di turismo ta mal noticia pa un pais cu ta depende asina hopi riba turismo. Aña pasa tabatin un caida di 9,3% compara cu 2018. Cuba a cera 2019 cu 4,3 miyon turista, 8,5% menos di loke tabata proyecta pa gobierno, y si e tendencia di januari continua, e caida na 2020 por ta mas grandi ainda.
