Un publicacion reciente a aclara cu e triciclonan nobo electrico cu a cuminsa move den Habana no ta destina exclusivamente pa tur transport di turismo internacional, manera algun medio a specula.
“E obhetivo di e triciclo electrico ta pa duna servicio na e poblacion, no exclusivamente na turismo,” e pagina Naturaleza Secreta ta splica riba Facebook, unda tabata actualisa informacion al respecto.
A revela tambe cuanto e vehiculonan a costa: “5.200 dollar, di cual e mayor parti a bay na e bateria di como 3.000 dollar, cu posibilidad pa haya 2.000 recharge, un recharge pa cada dia durante 5 aña.”
E detayenan a bin di Dr. Fabio Fajardo Moros, coordinador na Cuba di e Programa di Donacion Chikito di e Fondo pa Medio Ambiente Mundial y e Programa di Nacionnan Uni pa Desaroyo (PPD/FMAM/PNUD), organismo a traves di cual a cumpra e triciclonan.
“E idea di e proyecto aki ta promove fabricacion pa industria nacional di mayor parti posible di e piezanan necesario pa ensambla e triciclonan, di manera cu e costonan di adkisicion ta baha y ta obtene mayor soberania nacional den produccion,” Naturaleza Secreta ta splica.
Ensamblahe di e 23 triciclonan electrico ta den man di Empresa de Equipos y Aplicaciones Narciso Lopez Rosello.
Esnan responsable ta reconoce cu e funcionamento di e vehiculonan aki “no ta constitui riba nan mes un significativo aporte na transportacion den e ciudad.”
Anteriormente ya caba a informa cu na e pais tabatin ensamblahe di bicicleta, triciclo pa carga y cu motor, cu a cuminsa benta via tienda y mayoristanan bao e marca Minerva, parti di e strategia nacional di sustitucion di importacion.
