Cuba tin e deficit fiscal mas grandi di mundo, sin conta Ucrania

(CiberCuba) – Cuba tin e deficit fiscal mas grandi di mundo, sin conta Ucrania, segun un comparacion cu e ultimo rapport di e Fondo Monetario Internacional (FMI).

E propio regimen a bisa e siman aki dilanti e Asamblea Nacional di e Poder Popular cu e isla tin un deficit calcula di 18.5% di su PIB pa 2024, hopi mas halto cu e resto di e paisnan y solamente patras di Ucrania cu tin un 30.3%.

E economista Cubano Pedro Monreal a splica cu e deficit aki ta, cu un margen amplio, esun mas grandi di tur e deficitnan actual di mundo, cu excepcion di Ucrania, locual lo por preocupa e cobradonan di debe y inversionistanan.

“E deficit di 18.5% di e PIB di Cuba ta mas cu duplica e deficit internacional di Argelia, e di dos pais cu e deficit mas grandi despues di Ucrania. Ningun otro deficit reporta pa e FMI a supera e 8% di e PIB. otro paisnan den situacion di conflicto (Rusia, Nigeria, Sudan, Yemen) no a pasa 6.2%,” el a aclaria.

E dato a wordo presenta pa e Minister di Finanzas, Vladimir Reguerio Ale, dilanti e Asamblea Nacional di dia 18 di december ultimo, unda el a bisa cu pa 2024 e deficit fiscal ta bay tin un limite maximo ekivalente na 18.5% di e Producto Interno Bruto, e di dos porcentahe mas halto desde e caida na 1993 pa motibo di e periodo special.

Varios diputado a interveni pa señala cu un deficit asina halto ta bay traduci den mas inflacion y un deterioro mas grandi di e nivel di bida di e poblacion. Tocante esaki, nan a pidi pa revisa otro fuentenan potencial di ingreso y di con pa spaar gastonan.

Monreal ta bisa cu den e contexto ey e ta preocupante si e riesgo di debe y di inversion ta aumenta of disminui cu un inflacion di dos digito na un pais cu ta adopta un politica fiscal cu e di dos deficit fiscal mas grandi y cu e practica actual usual di cubri’e cu likides monetario. “E ta un decision economico racional?” el a cuestiona.

“E deficit ey ta indica un politica macroeconomcio cu ta fuera di control,” Monreal ta subraya, pa ken e situacion ey potencialmente lo por ocasiona perturbacionnan di diferente tipo.

Monreal ta analisa tambe e propuesta di presupuesto di e regimen pa 2024 y ta bisa cu potencialmente e ta converti den “papel muha” henter e dicho te cu aworaki tocante e establisacion macroenomico na Cuba.