(ElNuevoDiario) – Cuba ta exporta pa 51 paisnan vacuna, kit di diagnostico y medicamento desaroya pa su Centro di Ingenieria Genetico y Biotecnologia (CIGB), e centro mas grandi di investigacion na e isla. Pero excepto un envio pa un prueba clinico, Estadonan Uni no ta un de paisnan ey.

Pero e cientificonan di e amplio compleho aki situa na Cubanacán, Habana, lo tin gana di cambia esey. Nan ta mira Merca como un mercado natural unda e diabeticonan y pashentnan di diferente tipo di cancer no ta ricibi tratamento desaroya den e centro pionero aki.

Pa Cuba, den mester di placa en efectivo, e som ta masha simpel: Merca no solamente ta cerca, sino cu e tin un enorme cantidad di pashent cu por beneficia di medicamento y vacuna desaroya contra un sin fin di obstaculo den e principal centro di investigacion di e isla, y exporta e productonan  ey pa mercado Mericano por genera bon entrada.

“Tin ora mi no ta comprende pakico nos paisnan no ta probecha e excelente oportunidad aki pa traha hunto,” Manuel Rafael Raíces Pérez-Castañeda, biologo y director di fomento empresarial di e centro, ta bisa. “Nos ta enfrenta problema similar. Pakico no concentra riba e problemanan cu nos por soluciona hunto, y no riba e diferencianan?”

E investigadonan Cubano a desaroya tratamento cu ta mustrando potencial den henter mundo, y apesar di e embargo y e friamento den e relacionnan entre Cuba y Merca, nan ta hopi interesa den e mercado Mericano. E prome prueba clinico di un vacuna Cubano pa cancer di pulmon ta ser realisa na Roswell Park Cancer Institute na Buffalo, New York.

Aunke e Oficina Federal di Patente y Marca Comercial a aproba 99 patente di producto biotecnologico Cubano te cu december 2015, na e momento aki ningun medicamento Cubano ta registra na Food & Drug Administration (FDA) ni ta bende nan na Merca.

E proceso di inscripcion ta compleho y costoso, tanto cu Cuba a dicidi drenta otro mercado di acceso mas facil. A pesar di e deseo di Cuba di drenta mercado Mericano, e pais mes ta sufri desde varios luna caba di escasez di medicamento y mester renoba su industria farmaceutico.

Mientras tanto, den CIGB investigacion ta sigui. Un vacuna pa hepatitis B (Hebernasvac) y tratamento pa e cutis diabetico y cancer di cuero, ta algun di e innovacionnan Cubano cu e investigadonan ta bisa cu tin e potencial mas grandi den mercado Mericano. Pero prome cu por comercialisa nan, mester somete nan na prueba clinico aproba pa FDA.