(CiberCuba)—E Gobierno Cubano ta busca pa recupera su industria antiguo y deteriora di textiel cu proyectonan di financiamento stranhero procedente di Turkia.
Directivanan di e Ministerio di Industria (MINDUS) di Cuba a informa diamars ultimo di un reunion entre e embahador Cubano na Istanbul cu Ali Sami Aydis, vice presidente di Exportadores Textiles y Materias Primas di e ciudad ey.
E funcionarionan Turco conoce e situacion di e industria textiel Cubano y a acorda un futuro encuentro entre ambos pa establece proyectonan di inversion y negoshi, pero ta trata ainda di un propuesta den fase di evaluacion.
Esaki ta resultado di e bishita di e gobernante Miguel Diaz-Canel na e nacion Turco den luna di november di aña pasa, ora cu e presidente Recep Tayyip Erdogan a informa cu su pais lo aumenta e comercio cu Cuba pa 200 miyon di dollar.
Tocante e inversion Turco na Cuba, MINDUS a señala cu ta continua cu e ehecucion di e contract di compra y benta entre e empresa mixto Suchel Camacho y TFN ic ve dis Ticaret Anonim Sirketi, pa e suministro di articulonan di perfume y cosmetica.
Segun informacion di Granma, e organismo ta desaroya otro proyectonan di impacto cu Rusia y China, dos di e aliadonan mas importante di e dictadura Castrista.
Cu e prome, Rusia, ta ehecuta un proyecto pa recupera e empresa Antillana de Acero, pa cual Moscu a inverti 111 miyon di dollar, cu balor ehecuta di 94 miyon dollar.
E gobierno a pone su speransa den e reanimacion di e fabrica importante aki pa impulsa exportacionnan di e industria cu cual, e regimen ta spera, lo por genera ganashi di 103 miyon di dollar e aña aki.
Pa loke ta e acuerdo cu China pa e modernisacion di tecnologia di prensa Cubano, cu un credito di 82 miyon di dollar, a informa cu e unidad empresarial Grafica Habana ta conclui e construccion civil di e area di print.
Den un reunion di trabou cu e ministerionan di Economia y Planificacion y di Comercio Exterior y Inversion Stranhero, autoridadnan di MINDUS a comenta otro proyectonan di inversion stranhero den fase di negociacion.
Tin dos contract di asociacion economico internacional pa e produccion di pintura y sapato di proteccion (boots).
Por ultimo, den e industria kimico ta negoshando dos contract, un pa e produccion di fertilisante, biofertilisante y stimulante, y otro pa e creacion di un empresa mixto pa fabrica articulonan di material di papel.
