Ministerio di Relacion Exterior di Cuba (MINREX) a responde mediante un nota oficial riba e sancionnan nobo di gobierno Mericano.
Washington a endurece e medidanan contra gobierno Cubano pa nan apoyo na gobierno di Venezuela y Nicaragua. Den e sentido aki Secretario di Tesoro, Steven Mnuchin, a señala cu Cuba tabata “apoyando e adversarionan Mericano na lugarnan manera Venezuela y Nicaragua” y fomentando inestabilidad.
Minrex a nenga cu Cuba lo ta interviniendo militarmente na Venezuela, algo cu ta contrasta cu testimonio di Ronald Alirio Dugarte, teniente di aviacion Venezolano y ex-oficial di Direccion General di Contrainteligencia Militar (DGCIM), cu a revela na maart pasa cu ultimo tempo militarnan Venezolano ta hayando training di parti di Cubano.
E comunicado di gobierno Cubano ta bisa cu solidaridad di Cuba cu “Revolucion Bolivariano” no ta negociable. E comunicado ta confirma presencia di “mas di 20 mil colaborador Cubano” cu “di manera boluntario y abnega ta presta servicio social na e pais ey.”
Mesun dia e canciyer Cubano Bruno Rodriguez a bisa cu Merca ta purba daña nivel di bida di e Cubanonan y strangula nan economia.”
Gobierno Mericano a splica cu nan a tuma un “decision strategico pa fortifica e sancionnan y otro restriccionnan contra e regimen Cubano.”
Mnuchin a indica cu e accionnan ta contribui na “mantene e dollarnan Mericano fuera di alcance di e servicionan militar, di inteligencia y siguridad Cubano.
Gobierno Mericano a restringi biahe cultural y educativo (‘people-to-people’) pa Cuba y biahe riba crucero, embarcacion di recreo y avion priva. E medidanan por significa un golpi duro pa Cuba, cu ya ta pasando den un escasez severo di cuminda.
