Durante decadanan, e ilusion desde La Habana a laga kere cu profesionalismo di mediconan di Cuba castrista ta casi ireemplasabel. Cu su conocemento tabata superior na e medida di salubridad ofreci na resto di mundo. E propaganda medico a wordo crea durante añanan, y hopi pais –complice- a brasa e fantasia aki.
Ta asina cu e isla a exporta su mediconan na varios pais, te converti nan den casi esclavo. Un negoshi perfecto pa haya placa pa su arcanan, a costo di un trabou precarisa. Asina a denuncia Hector Schamis, profesor di Universidad di Georgetown, kende a publica e demanda.
E querella cu a ser presenta pa e dokternan Cubano a cay riba autoridadnan di e Organisacion Panamericano di Salud (OPS). “E cargo ta pa violacion di leynan y convencion internacional contra e trafico di persona y trabou forsa”, Schamis a splica. Y ta añadi cu e institucion a firma e contractnan cu e Sociedad Mercantil Comercialisador di Servicio Medico Cubano.
Pero e profesionalnan di Mais Medicos no ta bay nan so. Pa cada un di e paisnan den cual nan ta convoca bou plannan similar, nan ta hunto cu agentenan di inteligencia cu ta vigila nan tur ora. Na Brasil, Venezuela, Bolivia, of Angola. “Nan ta vigila, nan ta obliga pa cumpli cu funcion di politica y propaganda”, e profesor di Georgetown a añadi. “E programanan aki a ser haci durante ananan. Nan ta importante pa e divisa cu nan ta representa. E demanda ta bisa: ta alrededor di 8 mil miyon di dollar pa cada aña”, Schamis a sigura.
