(CiberCuba) – E regimen Cubano ta reconoce cu 1.236 comunidad di e pais ta biba den miseria. Asina e Minister di Trabao y Seguridad Social, Marta Elena Feiro Cabrera, a admiti dilanti Miguel Diaz-Canel, den un encuentro di trabao den cual el a sigura cu e 96% di e problemanan relaciona cu e pobresa extremo na e pais ta den proceso di transformacion integral, net na momento cu Cuba ta pasando den un di e pio crisisnan economico di su historia.
E cifranan di e regimen Cubano no ta cuadra cu loke otro organismonan independiente ta aporta. Na maart di aña pasa Cuba ya tabata e pais mas pober di Latino Amercia. Segun e reconoci observatorio electoral internacional DatoWorld, e isla tin un indice di pobresa di 72%, mas ariba cu esun di Venezuela (50%) y Honduras (48%) cu ta e Estadonan cu ta haci sombra na Cuba den e ranking di Latino America.
Pa yega na e conclusion aki nan a usa datonan aporta pa e Observatorio Cubano di Derechonan Humano (OCDH), cu na september di 2023 a denuncia un aumento hopi preocupante di e pobresa riba nivel nacional.
Den su rapport ariba e Estado di e Derechonan Social na Cuba, e OCDH a papia di un 88% di pobresa extremo, 13 punto mas halto cu na 2022. Mas di mil entrevista realisa pa e estudio aki, a indica cu loke mas ta preocupa e Cubanonan di e isla ta e alimentacion, e salarionan y e inflacion. Casi shete di cada dies persona cu a participa na e encuesta a wak un gestion hopi negativo di e autoridadnan y mas di ocho di cada dies a señala como insuficiente e inversion den e servicionan publico manera salubridad y educacion y den otro sectornan manera vivienda y agricultura.
E deterioro di e condicionnan di bida na Cuba ta asina pisa cu paisnan pober di e region mester a haci donacion di cuminda y medicamento. E crisis di e sistema sanitario y di alimentacion ta bira mas grave na e isla memey di un di e inflacionnan mas halto di mundo. Tin prueba cada dia. Esaki ta e caso di un pensionado di Holguin cu lamentablemente cu un pensioen di 1.700 pesos, el a paga mita di su salario (860) pesos pa 10 banana y otro fruta.
Na e situacion economico dificil aki mester agrega e represion pa silencia nan, por ehempel, esnan cu a pidi cambio den e protestanan di 11 di juli di 2021.
E perspectivanan di mehoracion no ta den bista ainda. Despues di e anuncio di e aumento di 500% den e prijs di combustibel varios economista Cubano a adverti cu e inflacion ta djis bay sigui crece.
