(CiberCuba) – E proyecto Cubano La Mina, cu ta enfoca riba e tratamento di residuo y e promocion di reciclahe, ta bay recolecta materia prima na La Habana, cu ta bay wordo destina pa e produccion di protesis pa pecho.
Personanan cu kier haci donacion por entrega plastic, glas, papel, BH cu padding y makeup usa, cu cual nan ta bay traha e protesisnan, segun un rapport di e agencia IPS Cuba riba Facebook.
La Mina ta un iniciativa di desaroyo sostenibel cu ta forma parti di e proyecto Embajada Rebirth/Tercer Paraiso Cuba, cu ta wordo promociona pa e artista Italiano Michelangelo Pistoletto y su fundacion Cittadellarte, y cu ta usa arte y creatividad pa conecta tur tipo di forma organisativo cu e obhetivo di traha hunto pa un desaroyo sostenibel na Cuba, segun e website ta anuncia.
Den luna di mei ya nan a lansa un convocatorio pa haci donacionnan di BH usa cu tin padding, cu e mesun proposito.
Segun e publicacion riba e pagina di Facebook di Embajada Rebirth/Tercer Paraiso Cuba, e iniciativa a wordo lansa pa e proyecto Produccion de Confecciones Textiles Estilos Maylie, cual su liña di produccion “Maryfe, amor y vida” ta orienta na mehora e calidad di bida di e pashentnan oncologico pa cancer di pecho.
“Esaki ta un oportunidad pa duna un bida nobo na algo cu ya no ta wordo usa, y na mesun momento, ofrece apoyo y mehora e calidad di bida di otro hende,” e texto ta señala.
Otro di e iniciativanan di La Mina ta “Copas para Cuba”, cu cual e ta promove for di 2021 e uso di e menstrual cup, un alternativa ecologico pa kotex.
Durante e ultimo simannan, e proyecto a realisa tayernan na e provincianan di Matanzas, Pinar del Rio, Artemisa y La Habana tocante e beneficionan di e menstrual cup y su impacto positivo den e medio ambiente.
Recientemente el e realisa tayernan cu muchanan tocante e cuido di medio ambiente y e tratamento di residuo cu e 3R, reduci, reusa y recicla.
Den juli ultimo, Embajada Rebirth/Tercer Paraiso Cuba, La Mina y otro proyectonan a realisa na La Habana e “Reciclaton” cu a recolecta materia prima, pochinan di cristal, pidanan di tela, paña cu no ta wordo usa mas, plastic limpi, carton, etc., pa iniciativanan cu ta recicla y reusa pa crea productonan nobo.
