E promer turistanan internacional a yega diabierna pasa na Cuba y lo ta hospeda riba e cayanan di e isla, despues di varios luna cu e pais a mantene su frontera cera pa e pandemia di Covid-19.
Segun ministerio di Turismo a duna di conoce, e turistanan cu a yega ta disfruta di Cayo Santa Maria y Cayo Coco, despues di e reapertura despues cu ta considera cu e punto culminante di e pandemia a pasa caba.
Desde e basenan aki a ricibi e bishitantenan cu implementacion di e protocolnan necesario pa garantisa nan seguridad y satisfaccion, autoridadnan a informa.
Lessner Gomez, director comercial na Agencia di Biahe Cubanacan Jardines del Rey, na Cayo Coco, a duna di conoce na rednan social cu danki na e autoridadnan local y Hotel Pullman Cayo Coco, por a logra ricibi e turistanan na Cayo Coco.
Ministerio di Salud Publico di Cuba a considera e situacion di e pandemia suficientemente bao control pa por cuminza cu gradualmente laga turista drenta atrobe. Entre e paisnan di nos region, Cuba ta actualmente na di cinco lugar cu cantidad di caso di Covid-19, y bastante aleha di e cifranan di e cuatro paisnan lider, cu ta Republica Dominicana, Guiana Frances, Haiti y Puerto Rico. Cuba ta conta te cu diasabra pasa 2633 caso, cu 87 morto y 2367 persona recupera. E dia cu mas caso nobo reciente tabata 28 di juli, cu 37. E ‘peak’ di caso tabata dia 3 di mei, unda tabatin 74 caso.
