Autoridadnan Cubano a habri e prome tiendanan pa benta na divisa, esaki ta forma parti di e pakete di medidanan economico cu a ser anuncia dia 15 di october pasa, nan a habri ayera, segun a informa.
Den total, lo ta 13 establecimento comercial, 12 na Havana y un na Santiago de Cuba, esun cu den prome etapa lo cuminsa cu e comercialisacion di ekipo electrodomestico y automotris, entre otro articulonan cu ta pertenece pa un grupo selecto autorisa pa e Gobierno di e isla.
Den a grupo aki, ta conta television di format grandi, frishider di gama halto y capacidad, airco split unit, freezer, wasmashin automatico, forno, toast y microwave, como tambe brommer electrico, bateria, tire y acesorio, unidad pa brommer y motor di combustion.
Nan lo mester paga a traves di carchinan asocia cu cuenta bancario den dollar y otro moneda internacional autorisa, pero nunca cu e dos moneda Cubano (CUP) y (CUC), cual a cuminsa habri pa e Cubanonan desde ayera dialuna na sucursal di e banconan principal di e isla.
Tambe lo por utilisa carchi internacional como VISA of MasterCard, esun cu ta funciona na isla no por ta di banconan Mericano y carchinan di AIS crea pa e empresa financiero Fincimex pa ricibi divisa for di exterior.
Finalmente, a confirma cu tiendanan lo sigui bende na peso convertible Cubano (CUC) cu tambe lo establece un descuento di prijs riba algun producto di e linea economico y cu ta pertenece pa e mesun grupo di articulonan cu lo bende na divisa.
E reduccion di prijs ta desde un 10 te un 15% y entre e productonan cu lo beneficia cu esey lo bay ta wasmashin, television y freezer.
